मनीला – फिलिपिन्समा हालैको आँधीसँगै आएको अविरल वर्षा, बाढी र पहिरोका कारण कम्तीमा ३० जनाको ज्यान गएको छ।
फिलिपिन्सको राष्ट्रिय विपद् जोखिम न्यूनीकरण तथा व्यवस्थापन परिषद् (NDRRMC) का अनुसार तीमध्ये १३ जनाको ज्यान गएको पुष्टि भइसकेको छ भने अन्यको पहिचान प्रक्रिया जारी छ।
चिनियाँ समाचार संस्था सिन्ह्वाले परिषद्लाई उद्धृत गर्दै सात जना अझै हराइरहेका जनाएको छ। ती मध्ये केही एक्कासी आएको बाढीले बगाएको र केही पहिरोमा पुरिएको आशंका गरिएको छ।
विपद्का कारण हालसम्म झन्डै १४ लाख ६० हजार परिवार प्रभावित भएका छन्। प्रभावित क्षेत्रहरूमा घर–आवास, खानेपानी, यातायात र बिजुलीजस्ता पूर्वाधारमा व्यापक क्षति पुगेको जनाइएको छ।
फिलिपिन्सको मौसम विज्ञान विभागका अनुसार लुजोन टापुको केही भागमा अझै केही दिन भारी वर्षा हुने सम्भावना रहेको छ।
प्रत्येक वर्ष आँधीबेहरीले ठूलो क्षति पुर्याउने गरेको फिलिपिन्समा अहिले पनि उद्धार र राहत कार्य तीव्र पारिएको जनाइएको छ।
