काठमाडौं – संघीय संसद् अन्तर्गतको राष्ट्रिय सभाको बैठक आज दिउँसो १:१५ बजे नयाँ बानेश्वरस्थित संसद् भवनमा बस्ने भएको छ। आजको बैठकमा महत्वपूर्ण दुई विधेयक र प्रतिवेदनमाथि छलफल हुने कार्यसूची तय गरिएको छ।
बैठकमा सञ्चार तथा सूचना प्रविधि मन्त्री पृथ्वीसुब्बा गुरुङले ‘चलचित्र विधेयक, २०८१’ लाई दफावार छलफलका लागि विधायन व्यवस्थापन समितिमा पठाउने प्रस्ताव संसद् समक्ष पेश गर्ने कार्यक्रम रहेको छ। सो विधेयकले फिल्म क्षेत्रको नियमन, प्रवर्द्धन तथा संरचना निर्माणमा कानुनी आधार तय गर्ने उद्देश्य राखेको छ।
त्यस्तै, विकास, आर्थिक मामिला तथा सुशासन समितिकी सभापति कमला पन्तले ‘नेपालको अतिकम विकसित राष्ट्रबाट विकासशील राष्ट्रमा स्तरोन्नतिसम्बन्धी अध्ययन प्रतिवेदन, २०८१’ माथि छलफलको प्रस्ताव पेश गर्नेछिन्। यो प्रतिवेदनले नेपालको आर्थिक, सामाजिक र संस्थागत सूचकाङ्कको मूल्याङ्कन गर्दै विकासशील राष्ट्रको बाटोमा अघि बढ्ने सम्भाव्यतालाई समीक्षा गरेको छ।
बैठकमा प्रधानमन्त्री तथा मन्त्रिपरिषद्को कार्यालयबाट प्राप्त मन्त्रिपरिषद् सदस्यहरूको कार्यभार तोकिएकोसम्बन्धी पत्रहरूको व्यहोरा पनि प्रस्तुत गरिनेछ।
यसैबीच, विधायन व्यवस्थापन समितिको बैठक आज बिहान १०:३० बजे बस्दैछ। सो बैठकमा ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ माथि दफावार छलफल हुने कार्यसूची छ। सो विधेयक अपराध अनुसन्धानमा वैज्ञानिक प्रमाण संकलन तथा विश्लेषणका लागि विधि विज्ञान प्रयोगशालाको कानुनी संरचना निर्माण गर्न ल्याइएको हो।
आजको बैठकले संसद्मा विचाराधीन महत्त्वपूर्ण विधेयकहरूमा दफावार छलफल अघि बढाउने प्रक्रिया तीव्र बनाउने अपेक्षा गरिएको छ।
