काठमाडौं, असोज २० – सुदूरपश्चिम प्रदेशका विभिन्न स्थानहरूमा सोमबार दिउँसोदेखि मङ्गलबार बिहानसम्म हल्कादेखि मध्यम वर्षा हुने सम्भावना रहेको जल तथा मौसम विज्ञान विभागको अत्तरियास्थित महाकाली बेसिन फिल्ड कार्यालयले जनाएको छ।
महाकाली बेसिन कार्यालयका प्रमुख सञ्जय शाहका अनुसार बङ्गालको खाडीबाट प्रवेश गरेको मनसुनी वायुसँग सम्बन्धित न्यूनचापीय रेखा हाल नेपालबाट बाहिरिसकेको भए पनि, स्थानीय वायुले असर गरिरहेकोले केही स्थानहरूमा वर्षाको सम्भावना देखिएको हो।
हाल कञ्चनपुर र कैलाली जिल्लामा सामान्य बदली देखिएको छ। स्थानीय वायुको प्रभावका कारण यी जिल्लाका केही स्थानहरूमा निकट भविष्यमा सामान्यदेखि मध्यम वर्षा हुन सक्ने पूर्वानुमान गरिएको छ।
शाहका अनुसार, पूर्ण रूपमा मनसुन नेपालबाट नहटेकाले अझै केही दिन मौसम परिवर्तनशील रहनेछ। यद्यपि, सुदूरपश्चिममा ठूलो वर्षाको सम्भावना भने नरहेको स्पष्ट गरिएको छ।
