काठमाडौँ । पाल्पा जिल्लाको तानसेन नगरपालिका–१३ स्थित बैकुण्ठे भीरमा बुधबार जिप दुर्घटना हुँदा १२ जना घाइते भएका छन्। बुटवलबाट बागलुङको बुर्तिबाङका लागि छुटेको जिप रानीमहल सडक खण्डमा दुर्घटना भएको हो। चालकसहित १४ जना सवार जिपका १२ जना घाइते भएका हुन् भने दुई जना सकुशल छन्।
घाइतेमध्ये बागलुङको बडिगाड गाउँपालिका–७ की २९ वर्षीया कल्पना विक र नवलपरासी बर्दघाट नगरपालिका–१० की ४६ वर्षीया चन्द्रकुमारी रोकाको अवस्था मध्यम रहेको जिल्ला प्रहरी कार्यालय पाल्पाका प्रहरी नायब उपरीक्षक होम प्रकाश चौधरीले जानकारी दिनुभयो। उनीहरूको अहिले मिसन अस्पताल पाल्पामा उपचार भइरहेको छ।
अन्य घाइतेमा बडिगाड गाउँपालिका–७ का ३९ वर्षीय सवारी चालक चितमान गुरुङ, ४४ वर्षीय केशव गुरुङ, १८ वर्षीया सपना गुरुङ, ११ वर्षीय शिशिर विक, निसीखोला गाउँपालिका–१ का ७ वर्षीया सृष्टि विक र ४७ वर्षीय दिलबहादुर थापा रहेका छन्।
यस्तै पाल्पाको बगनाशकाली गाउँपालिका–८ का ३३ वर्षीय टिका न्यौपाने र १० वर्षीय रिदम न्यौपाने, नवलपरासी बर्दघाट–१० की २२ वर्षीया आशा कुमारी रोका र रुपन्देहीको सैनामैना नगरपालिका–३ की २७ वर्षीया हुमा छन्त्याल घाइते भएका छन्। सबैको मिसन अस्पताल पाल्पामा उपचार भइरहेको छ।
दुर्घटनाबारे अनुसन्धान भइरहेको र चालकलाई नियन्त्रणमा लिइएको प्रहरी नायब उपरीक्षक चौधरीले जानकारी दिनुभयो।
