काठमाडौं । सहकारी ठगीको आरोप लागेका विष्णुबहादुर बमरेललाई अदालतले पुर्पक्षका लागि थुनामा पठाउने आदेश गरेको छ । पाल्पाको रम्भा अन्तर्गत हुमिनको लालीगुराँस बचत तथा ऋण सहकारी संस्थाको झन्डै तीन करोड रुपियाँ हिनामिना गरेको आरोप लागेका बमरेललाई जिल्ला अदालत पाल्पाले पुर्पक्षका लागि थुनामा पठाउने आदेश गरेको हो ।
अदालतका स्रेस्तेदार केशव पराजुलीले बमरेललाई सहकारी ठगीसम्बन्धी मुद्दामा पुर्पक्षका लागि थुनामा राख्ने आदेश भएको जानकारी दिनुभयो । गत आर्थिक वर्ष २०८०/८१ मा सहकारी संस्थाले गरेको लेखा परीक्षण प्रतिवेदनमा व्यवस्थापक बमरेलले दुई करोड ८७ लाख ५७ हजार रुपियाँ हिनामिना गरेको उल्लेख थियो ।
सोही प्रतिवेदनका आधारमा सहकारी संस्थाका अध्यक्ष सुवि विश्वकर्मालगायतले बमरेललाई जिल्ला प्रहरी कार्यालयमा उजुरी दिएपछि बमरेललाई पक्राउ गरिएको थियो । प्रहरीले गत साउन २८ गते घरबाटै पक्राउ गरेर अनुसन्धान गरी अदालतमा सहकारी ठगीसम्बन्धी मुद्दा दायर गरेको जिल्ला प्रहरी कार्यालय पाल्पाले जनाएको छ ।
नक्कली ऋणी खडा गरेर सहकारी संस्थाको रकम हिनामिना गरेको बमरेलमाथि आरोप छ । बमरेलले दुई करोड ८७ लाखबाहेक थप ३० लाख रकम आफ्नै नाममा ऋण लिएर संस्थालाई धराशायी बनाएको सञ्चालक समितिको भनाइ छ ।
सहकारी संस्थाले जिल्लाको रम्भा, माथागढी, पूर्वखोला र बगनासकाली गाउँपालिकामा सेवा विस्तार गरेको थियो । सबै पालिकामा कम्तीमा एक देखि दुई वटा सेवा केन्द्रसमेत खोलिएको थियो । सहकारी संस्थामा आबद्ध एक हजार पाँच सय सदस्यले अहिले बचत रकम माग गर्दा फिर्ता गर्न नसकेको सहकारीले जनाएको छ । अध्यक्ष विकले विभिन्न पालिकाका बचतकर्ताले रकम माग गरे पनि फिर्ता गर्न नसकेको बताउनुभयो । सहकारी संस्थाले राष्ट्रिय सहकारी बैङ्कलगायतका संस्थासँग लिएको ऋण भने तिर्दै आएको छ । गोरखापत्र
