काठमाडौं । धरान उपमहानगरपालिका–१३ स्थित गोर्खा वेल्फेयर मोड नजिक शनिबार राति भएको पिकअप दुर्घटनामा एक जनाको मृत्यु भएको छ भने ११ जना घाइते भएका छन्। भेडेटारबाट धरानतर्फ आउँदै गरेको प्र.१–०२–००२–च ३८२६ नम्बरको टाटा योद्धा पिकअप अनियन्त्रित भई सडक किनारमा पल्टिँदा विराटनगर–६ का २१ वर्षीय रोहन कामतको घटनास्थलमै मृत्यु भएको इलाका प्रहरी कार्यालय धरानका निमित्त प्रमुख प्रहरी निरीक्षक जीवन कुँवरले जानकारी दिए।
दुर्घटनामा घाइते भएकाहरूको बिपी कोइराला स्वास्थ्य विज्ञान प्रतिष्ठान धरानमा उपचार भइरहेको प्रहरीकाे भनाइ छ। घाइतेमध्ये इटहरी–५ का ४० वर्षीय सञ्जय पाल, दुहबी–९ का १९ वर्षीय एमडी एकबाल राईन, विराटनगर–७ का २६ वर्षीय रोशन कामत, इटहरी–१ का २० वर्षीय दुर्गामणि चौधरी, इटहरी–४ का १८ वर्षीय शुभम् रौनियार, इटहरी–२ का १८ वर्षीय प्रदीपकुमार दास, विराटनगर–९ का २२ वर्षीय विशाल माझी, दुहबी–६ का २१ वर्षीय आयुष चौधरी, विराटनगर–९ का २२ वर्षीय वेदा मिश्र, विराटनगर–२ का २६ वर्षीय अनु कामत तथा गाडी चालक उदयपुर ताप्ली–२ का २८ वर्षीय जीवनकुमार श्रेष्ठ रहेका छन्। दुर्घटना कसरी भयो भन्ने विषयमा थप अनुसन्धान भइरहेको प्रहरीले जनाएको छ।
