काठमाडौं । रुपन्देहीको सैनामैना नगरपालिकामा नगर अस्पताल बनेको दुई वर्ष भयो । आवश्यक जनशक्ति, उपकरण र आर्थिक अभावका कारण अस्पतालको सेवा प्रभावकारी हुन सकेको छैन । सङ्घीय सरकारको आर्थिक सहयोगमा सैनामैना नगरपालिका–४, मुर्गियामा १५ शय्याको अस्पताल दुई वर्षअघि निर्माण सम्पन्न भएको हो । १२ करोड रुपियाँ लागतमा बनेको चारतले अस्पताललाई पूर्ण क्षमतामा सञ्चालन गर्न जनशक्ति र आर्थिक अभाव समस्याका रूपमा देखिएको छ । नगरपालिकाले आफ्नै बलबुतामा अहिले सोही भवनबाट नगर अस्पतालको सेवा सञ्चालन गरेको छ तर जनशक्ति तथा उपकरणको अभावमा समस्या परेको छ । नगरपालिकाका स्वास्थ्य शाखा प्रमुख वसन्त श्रेष्ठले नगरपालिकाले वार्षिक एक करोड रुपियाँ बजेट विनियोजन गरी नगर अस्पतालको सेवा सुरु गरेको बताउनुभयो । सोही रकमबाट औषधी खरिददेखि अस्पतालको जनशक्ति व्यवस्थापनको काम केही मात्रामा भइरहेको श्रेष्ठले बताउनुभयो ।
उहाँले सङ्घीय सरकारबाट अस्पताल सञ्चालन खर्च नआउँदा बिरामी भर्ना गरेर सेवा दिन नसकिएको बताउँदै सहयोग पठाउने आश्वासन पाएकाले अस्पतालको सेवा विस्तार हुने अपेक्षा रहेको उल्लेख गर्नुभयो । तत्कालीन प्रधानमन्त्री केपी शर्मा ओलीले २०७७ मङ्सिर १७ गते दुई वर्षभित्र सम्पन्न गर्ने गरी देशका विभिन्न स्थानीय तहमा आधारभूत अस्पताल बनाउने निर्णय गर्नुभएको थियो । सोही निर्णय अनुसार सैनामैना नगरपालिकाको मुर्गियामा १५ शय्याको सैनामैना नगर अस्पताल बनेको हो । अस्पताल भवन रहेको सैनामैना नगरपालिका–४ का वडाध्यक्ष रामप्रसाद अधिकारीले अहिले एक जना एमबिबिएस चिकित्सकको व्यवस्था गरी अस्पतालले सेवा दिइरहेको बताउँदै जनशक्ति अभाव र अस्पतालको सञ्चालन खर्च अभाव रहेको बताउनुभयो । अस्पताल सञ्चालनका लागि सरकारले ३२ जनाको दरबन्दी तोकेको छ तर अस्पतालमा सरकारले दरबन्दी अनुसारको जनशक्ति पठाएको छैन । वडाध्यक्ष अधिकारीले अस्पतालको सञ्चालन खर्च वार्षिक तीन करोडभन्दा बढी लाग्ने बताउँदै नगरपालिकाले वार्षिक एक करोड बजेट छुट्याएर अस्पताल सञ्चालन गरिरहेको बताउनुभयो ।
सरकारले १५ शय्याको अस्पतालका लागि मेडिकल डाक्टर एक जना, मेडिकल अधिकृत दुई जना, स्टाफ नर्स छ, हेल्थ असिस्टेन्ट चार, आयुर्वेद सहायक एक जनाको दरबन्दी छ । ल्याब टेक्निसियन, रेडियोग्राफर, फार्मेसी सहायक, डेन्टल हाइजिनिस्ट, एनेस्थेटिक सहायक, अप्थाल्मिक सहायक, नायब सुब्बा प्रशासन एक/एक, कार्यालय सहयोगी छ र सरसफाइकर्मी तीन गरी ३० जनाको दरबन्दी हुने व्यवस्था गरेको छ । उक्त अस्पतालमा दरबन्दी अनुसारका स्वास्थ्यकर्मी नहुँदा हेल्थपोस्टका स्वास्थ्यकर्मीले सोही अस्पतालबाट सेवा दिँदै आएका छन् । गोरखापत्र
