काठमाडौं । धनकुटा जिल्लाको पाख्रीबास नगरपालिका–५ स्थित चौतारामा करेन्ट लागेर एक जना बालकको मृत्यु भएको छ। बुधबार बिहान करिब ९ बजेतिर विद्युतको सपोर्ट तारबाट करेन्ट लाग्दा १४ वर्षीय बालकको घटनास्थलमै ज्यान गएको हो। मृत्यु हुनेमा पाख्रीबास–५ गैरीगाउँ निवासी बादल तामाङ रहेको जिल्ला प्रहरी कार्यालय धनकुटाले जनाएको छ। प्रहरीका अनुसार तामाङ बिहान दाउरा काट्न जङ्गल गएका थिए। सोही क्रममा विद्युतको पोललाई सहारा दिन भुइँमा गाडिएको सपोर्ट तारमा करेन्ट प्रवाह हुँदा उनलाई करेन्ट लागेको थियो।
करेन्ट लागेपछि तामाङको घटनास्थलमै मृत्यु भएको प्रहरीले पुष्टि गरेको छ। घटनाको विषयमा थप अनुसन्धान भइरहेको र मृतकको शवलाई पोष्टमार्टमका लागि जिल्ला अस्पताल धनकुटा लैजाने तयारी भइरहेको जिल्ला प्रहरी कार्यालय धनकुटाका प्रहरी प्रमुख एसपी शरतकुमार थापा क्षेत्रीले जानकारी दिनुभयो।
