काठमाडौं । सप्तरी कारागार कार्यालय राजविराजमा चेकजाँचका क्रममा प्रतिबन्धित लागु औषध र मोबाइल फेला परेको छ । राजविराज नगरपालिका ६ स्थित मा रहेको कारागार कार्यालयको ‘ए’ ब्लकमा रहेका कैदीहरूको मङ्गलबार चेकजाँच गर्ने क्रममा लागु औषध गाँजा र मोबाइल बरामद भएको हो । कारागार कार्यालय सप्तरीका शाखा अधिकृत रूपक मण्डल र प्रहरी नायब निरीक्षक भाग्य नारायण साहको कमान्डमा तथा ‘ए’ ब्लकका चौकीदार मो जोहर अन्सारीको उपस्थितिमा चेकजाँच गरिएको थियो ।
सोही क्रममा कैदी सुमित मण्डल र सुरज राउतको साथबाट लागु औषध र मोबाइल फेला परेपछि नियन्त्रणमा लिइएको कारागार प्रशासनले जनाएको छ । प्राप्त विवरण अनुसार, सप्तरी जिल्ला अदालतबाट कर्तव्य ज्यान मुद्दामा मिति २०८० माघ १३ गतेदेखि दुई वर्ष कैद सजाय भोगिरहेका महादेवा गाउँपालिका २ निवासी ३० वर्षीय सुमित मण्डको साथबाट प्लास्टिकमा लुकाइछिपाइ राखिएको गाँजा एक खिल्ली तथा एक थान चिलिम बरामद गरिएको छ ।
त्यसैगरी, हातहतियार खरखजना मुद्दामा मिति २०८० पुस ०४ गतेदेखि चार वर्ष कैद सजाय भोगिरहेका राजविराज नगरपालिका ६ निवासी २९ वर्षीय सुरज राउतको साथबाट किप्याड लाभा कम्पनीको सिमसहितको एक थान मोबाइल फोन बरामद गरिएको हो । घटनाबारे थप अनुसन्धान भइरहेको जिल्ला प्रहरी कार्यालय सप्तरीबाट प्रहरी नायब उपरीक्षक डम्बरबहादुर पुरीले जानकारी दिनुभयो । गोरखापत्र
