काठमाडौं । नेपाली कम्युनिष्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ ले आफ्नो पार्टीले अघि सारेको मागअनुसार नै सिङ्गो मुलुक निर्वाचनमा होमिएको दाबी गर्नुभएको छ । नेकपा काठमाडौँ क्षेत्र नम्बर–५ ले आज आयोजना गरेको पार्टी प्रवेश कार्यक्रममा बोल्दै उहाँले जेनजी आन्दोलनको मर्म र भावनाअनुसार नेपाली कम्युनिष्ट पार्टी निर्माण गरिएको बताउनुभयो । नेपालभित्र रहेका सबै कम्युनिष्ट शक्ति अट्न सक्ने गरी पार्टी गठन गरिएको उहाँको भनाइ छ । “नेपाली कम्युनिष्ट पार्टीमा हाल साना–ठूला गरी २६ वटा पार्टी समाहित भएका छन् । हजारौँ कार्यकर्ता पार्टीमा जोडिइसकेका छन्,” प्रचण्डले भन्नुभयो ।
पूर्वप्रधानमन्त्री दाहालले नेकपाले सुरुदेखि नै निर्वाचनको माग गर्दै आएको र अहिले त्यही मागअनुसार देश निर्वाचन प्रक्रियामा प्रवेश गरेको उल्लेख गर्नुभयो । उहाँका अनुसार नेकपा दिनप्रतिदिन बलियो बन्दै गएको छ र जनताको भरोसाको केन्द्रका रूपमा स्थापित हुँदैछ । सामाजिक सञ्जालमा पपुलिज्मको नाममा लोकतन्त्रमाथि प्रहार गर्ने प्रयास भइरहेको उल्लेख गर्दै दाहालले त्यसको प्रतिवाद गर्न नेकपा मजबुत विकल्प बनेको दाबी गर्नुभयो । देशैभर नेकपाप्रति जनलहर बढ्दै गएको र पार्टीले अघि सारेका नीतिप्रति जनताको आशा र विश्वास थपिँदै गएको उहाँको भनाइ थियो ।
कार्यक्रममा नेकपा काठमाडौँ क्षेत्र नम्बर–५ की प्रतिनिधिसभा सदस्य उम्मेदवार कल्पना शर्माले जेनजी आन्दोलनपछि देश नयाँ दिशातर्फ अघि बढेको बताउनुभयो । जेनजी आन्दोलनलाई संस्थागत रूपमा स्थापित गर्न आगामी निर्वाचनमा नेकपाको जित आवश्यक रहेको उहाँको भनाइ छ । त्यस्तै, नेकपा काठमाडौँ क्षेत्र नम्बर–६ का प्रतिनिधिसभा सदस्य उम्मेदवार हिमाल शर्माले जेनजी आन्दोलनको मर्म र भावनालाई आत्मसात गर्दै नेकपा नयाँ चुनाव चिह्नसहित चुनावी मैदानमा उत्रिएको बताउँदै पार्टीलाई जिताउन आग्रह गर्नुभयो । कार्यक्रममा वरिष्ठ खेलाडी रेनुका श्रेष्ठसहित दर्जनौँ व्यक्ति एमाले परित्याग गरी नेकपामा प्रवेश गरेका थिए ।
