काठमाडौँ – दसैँ मनाउन घर जाने यात्रुका लागि आजदेखि लामो दूरीका सार्वजनिक यातायातको अग्रिम टिकट बुकिङ खुला भएको छ। बुकिङ सुरु भएसँगै काठमाडौँको नयाँ बसपार्कमा टिकट लिन यात्रुहरूको भीड लागेको छ। यात्रुहरू आफ्नो गन्तव्यका लागि टिकट सुनिश्चित गर्न बिहानैदेखि लाइनमा बसेका छन्।
यातायात व्यवस्था विभाग, नेपाल प्रहरी, यातायात व्यवसायी तथा मजदुरबीच असोज २० गते विभागमा भएको बैठकले असोज २३ गतेदेखि दसैँका लागि अग्रिम टिकट बुकिङ खुला गर्ने निर्णय गरेको थियो। सोही निर्णयअनुसार आजदेखि टिकट बिक्री सुरु गरिएको हो।
टिकट बुकिङ सहज बनाउन ल्होत्से बहुउद्देश्यीय प्रालिले नयाँ बसपार्क क्षेत्रमा १५ वटा काउन्टर थप गरेको छ। दसैँमा काठमाडौँबाट घर फर्किने यात्रुको चाप बढ्ने भएकाले थप काउन्टर सञ्चालनमा ल्याइएको हो।
