काठमाडौँ । कञ्चनपुरमा रहेको नकैया सिमसार क्षेत्रमा ३० वटा लक्ष्मण सारस देखा परेका छन् । बेलौरी नगरपालिका –७ मा रहेको सो सिमसार क्षेत्रमा मंगलबार (फागुन २० गते) सो संख्यामा लक्ष्मण सारस देखा परेका हुन् । नेपाल–भारतमा बस्ने यो प्रजातिको सारस हिउँदे आगन्तुक मानिन्छ । जाडो याममा नेपालको विभिन्न ठाउँमा देखा पर्ने गर्दछन् । चरा अवलोकनका लागि महत्वपूर्ण गन्तव्य बनिरहेको नकैया सिमसारमा विभिन्न समयमा सारस प्रजातिका चरा देखा पर्दैआएको चराविद हिरुलाल डङ्गौराले बताउनुभयो । उहाँका अनुसार यस वर्ष सो क्षेत्रमा दुर्लभ सारस क्रेन पनि देखा परेका थिए । नकैया सिमसार क्षेत्रमा विभिन्न प्रजातिका जलपन्छी पाइने गरेको नेचरगाइड सुवन चौधरीले बताउनुभयो । सारसलाई सिमसारको सूचकको रुपमा लिइने गरिन्छ । सारसको उपस्थितिले सिमसारको अवस्था तुलनात्मक रुपमा राम्रो रहेको बुझिन्छ । नेपालमा लक्ष्मणसहित सारस क्रेन, कर्याङकुरुङ, कालो टाउके सारस गरेर चार प्रजातिका सारस पाइने गरेका छन् ।
