अमेरिकी पूर्वराष्ट्रपति डोनाल्ड ट्रम्पले गजामा युद्ध अन्त्य गर्ने प्रस्ताव अघि सारेपछि हमासले पहिलो चरणमा बन्धक रिहा गर्न सहमति जनाएको छ। हमासले ट्रम्पको २० बुँदे योजनामा औपचारिक प्रतिक्रिया दिँदै बन्धक र मृतकको शव फिर्ता गर्न तयार भएको जनाएको हो।
ट्रम्पले इसराइललाई गजामा बमबारी तुरुन्त रोक्न आग्रह गर्दै, हमासलाई निरस्त्रीकरण, बन्धक-वैदी आदानप्रदान, इसराइली सेनाको फिर्ती र संक्रमणकालीन सरकार गठनजस्ता प्रस्ताव राखेका छन्। योजना अनुसार गजाको पुनर्निर्माणका लागि बोर्ड गठन गरिनेछ, जसको नेतृत्व ट्रम्पले गर्नेछन् भने टोनी ब्लेयर समेत सो बोर्डमा रहनेछन्।
यस योजनामा साउदी अरेबिया, युएई, कतार, इजिप्टलगायत मुस्लिम देशहरूको समर्थन रहेको जनाइएको छ। यद्यपि हमासले अझै केही बुँदामा सहमति नजनाए पनि पहिलो चरण अन्तर्गत सहकार्य गर्न तयार देखिएको छ।
गजामा २२ महिनादेखि जारी युद्धका क्रममा हजारौं प्यालेस्टिनीको ज्यान गएको छ। इसराइली कारबाहीको आलोचना अन्तर्राष्ट्रिय रूपमा बढ्दो छ। फ्रान्स, बेलायत, क्यानडा, अस्ट्रेलियालगायत देशले हालै प्यालेस्टाइनलाई राज्यको मान्यता दिइसकेका छन्।
