काठमाडौं । मलेसियामा जारी महिला टी–२० अन्तर्राष्ट्रिय क्रिकेट शृङ्खलाको चौथो खेलमा नेपालले मलेसियालाई छ विकेटले पराजित गर्दै शृङ्खलामा २–२ को बराबरी ल्याएको छ। पाँच खेलको शृङ्खलामा अब निर्णयक खेल भोलि (बुधबार) हुनेछ।
आज भएको खेलमा मलेसियाले दिएको ११२ रनको लक्ष्य नेपालले १७.३ ओभरमा चार विकेटको क्षतिमा सजिलै पूरा गर्यो। नेपालका लागि कप्तान इन्दु बर्मा ४८ रनमा अविजित रहिन्। उनले ३९ बलमा चार चौका प्रहार गरिन्। अर्की ब्याटर रुबिना क्षेत्रीले २३ बलमा २३ रन जोडिन्।
मलेसियाका लागि नुर दानिया स्युहादा, आइना हमिजा र माहिरा इजातीले समान एक–एक विकेट लिए।
त्यसअघि टस जितेर पहिले ब्याटिङ गरेको मलेसियाले निर्धारित २० ओभरमा ५ विकेट गुमाएर १११ रन बनाएको थियो। उसका लागि मास एलिसा ५६ रनमा अविजित रहिन्। माहिराले १८ र नुर दानियाले १५ रन बनाइन्।
नेपालका लागि कविता कुँवरले ३ विकेट लिइन् भने पूजा महतो र कविता जोशीले समान १–१ विकेट लिए।
यसअघि नेपाल पहिलो खेलमा ३ रनले पराजित भएको थियो भने दोस्रो खेलमा ६ विकेटले जितेको थियो। तेस्रो खेलमा भने नेपाल १३ रनले पराजित भएको थियो।
अब शृङ्खलाको निर्णायक पाँचौँ खेल भोलि हुने छ, जसले शृङ्खलाको विजेता टुंगो लगाउनेछ।
