काठमाडौं । रुपन्देहीमा महिलाले नेतृत्व गरेको एक मात्र सामुदायिक वन जिल्लाकै नमुना बन्दै गएको छ । रुपन्देहीको कञ्चन गाउँपालिका–५, पिपरीचापामा रहेको पिपरीचापा महिला सामुदायिक वन उपभोक्ता समूह जिल्लाकै नमुना बन्न सफल भएको छ । वनको १८ औँ साधारण सभाको अवसरमा आयोजना गरिएको कार्यक्रममा बोल्दै डिभिजन वन कार्यालय रुपन्देहीका प्रमुख वन अधिकृत प्रवीण बिडारीले महिलाले नेतृत्व गरेको यो सामुदायिक वनमा चोरीनिकासीको समस्या नरहेको बताउँदै यो सामुदायिक वनले जिल्लामै आफूलाई उदाहरणीय वनका रूपमा प्रस्तुत गर्न सफल भएको बताउनुभयो ।
कञ्चन गाउँपालिका–५, का वडाध्यक्ष कुलप्रसाद पौडेलले स्थानीय महिलाको सक्रियतामा संरक्षण गरी गठन गरिएको पिपरीचापा महिला सामुदायिक वन उपभोक्ता समूहले वनको समृद्धि र संरक्षणमा प्रभावकारी कार्यक्रम सञ्चालन गरेको बताउनुभयो । महिलाले संरक्षण गरेको वनबाट हुने आम्दानीले महिलाले वनको संरक्षणसँगै बचत सङ्कलन गरी गाउँका महिलालाई आवश्यक पर्दा ऋणसमेत प्रदान गर्दै आइएको छ । सामुदायिक वन उपभोक्ता महासङ्घ रुपन्देहीकी अध्यक्ष सुमित्रा आचार्यले महिलाले नेतृत्व गरेको वनले पारदर्शी भएर काम गरेको बताउँदै वन संरक्षणमा उल्लेखनीय योगदान पुगेको बताउनुभयो । गोरखापत्र
