काठमाडौं । नेपाली राष्ट्रिय महिला क्रिकेट टोलीको मुख्य प्रशिक्षकको जिम्मेवारी हर्शल जयन्त पाठकले पाउनुभएको छ। नेपाल क्रिकेट सङ्घ (क्यान) ले मङ्गलबार भारतीय पूर्व क्रिकेटर पाठकलाई औपचारिक रूपमा प्रशिक्षक नियुक्त गरेको हो। यसअघि थाइल्यान्डको महिला क्रिकेट टोलीसँग काम गरिसक्नुभएका पाठक नेपाली महिला टोलीका लागि पहिलो विदेशी प्रशिक्षक बन्नुभएको छ। क्यानले प्रशिक्षक छनोटका लागि खुला दरखास्त आह्वान गरेको थियो, जसमा विभिन्न देशका करिब ७० जना प्रशिक्षकले आवेदन दिएका थिए। ती आवेदकमध्येबाट पाठक छनोटमा पर्नुभएको हो।
नवनियुक्त प्रशिक्षक पाठकले नेपाली महिला टोलीलाई आगामी आइसिसी महिला टी–२० विश्वकपको ग्लोबल छनोट प्रतियोगिताका लागि तयारी गराउनुहुनेछ। उक्त छनोट सन् २०२६ को जनवरी १२ देखि फेब्रुअरी १ तारिखसम्म कीर्तिपुरस्थित घरेलु मैदानमा आयोजना हुनेछ। यस प्रतियोगितालाई लक्षित गर्दै नेपाली महिला टोलीको बन्द प्रशिक्षण क्याम्प सुरु भइसकेको छ।
