काठमाडौं । कालीकोटको शुभकालिका गाउँपालिका –६ मटिखान बजारमा मालवहाक ट्रक दुर्घटनामा परेको छ । शुभकालिका –४ सुकाटियाबाट समान लिएर महावै गाउँपालिका जादै गरेको मालवहाक ट्रक मटिखान बजारनजिक दुर्घटनामा परेको हो । कर्णाली प्रदेश क ०२–००१ ख०२३० नम्वरको मालवहाक ट्रक दुर्घटना हुँदा मानवीय क्षति भने भएको छैन । दुर्घटना हुने पूर्व संकेत हुँदा चालक र मालवाहक ट्रकका सहचालकसहित अन्य दुई जना गरी चारैजना हाम फालेर जोगिएका छन् ।
स्थानीय जगतप्रसाद भट्राईले मालवाहक ट्रक दुर्घटना हुने अवस्थामा सबै जना हाम फालेर जोगिएको बताउनुभयो । “गए राति पानी धेरै परेकाले सडकमा थुप्रो परेको माटो भिजेर गलेको रहेछ । त्यसैमा ट्रक गुडाउँदा भाँसिदै गएपछि चालकसहितका चारै जना ढोका खोलेर हाम फाले । चालकले केही प्रयास गरे पनि दुर्घटनाबाट जोगाउन नसक्ने भए पनि उहाँले पनि हाम फालेर मानवीय क्षति हुनबाट जोगिएको हो” भट्टराईले भन्नुभयो । दुर्घटनाको खबरपछि प्रहरी त्यसतर्फ गइरहेको जिल्ला प्रहरी कार्यालय कालीकोटले जनाएको छ । एसईईको परीक्षा भएकाले प्रहरी परीक्षा केन्द्रको सुरक्षामा हुँदा दुर्घटनास्थलमा जान ढिलाइ भएको प्रहरीको भनाइ छ । गोरखापत्र
