काठमाडौं । नेपाली कांग्रेसको १५औँ महाधिवेशनअन्तर्गत वडा तहको अधिवेशन आजदेखि सुरु भएको छ। कांग्रेसले देशभरका ६ हजार ७४३ वडामा वडा कार्यसमिति निर्वाचन तथा क्षेत्रीय प्रतिनिधि चयन गर्ने कार्यतालिका बनाएको छ।
केन्द्रीय निर्वाचन समितिका अनुसार असोज ३ र ४ गते वडा अधिवेशन गर्ने गरी तयारी गरिएको थियो। ७७ वटै जिल्लामा निर्वाचन अधिकृत खटाइसकिएको र सम्बन्धित जिल्लामा निर्वाचन प्रक्रिया अघि बढाइएको समितिले जनाएको छ। जिल्ला निर्वाचन अधिकृतहरूले स्थानीय तह तथा पार्टीका सम्बन्धित पदाधिकारी र सदस्यसँग निर्वाचनसम्बन्धी छलफल गरी वडा तहमा मतदान अधिकृत खटाउनेलगायतका तयारी पूरा गरेका छन्।
केन्द्रीय निर्वाचन समितिले वडा अधिवेशनका विषयमा फैलिन सक्ने अफवाह तथा भ्रामक सूचनामा विश्वास नगर्न आग्रह गर्दै क्रियाशील सदस्य तथा पार्टीका सबै तह र निकायलाई निर्धारित निर्वाचन प्रक्रियामा सहभागी हुन अनुरोध गरेको छ। कांग्रेसको परिमार्जित कार्यतालिकाअनुसार वडा अधिवेशनपछि असोज ७ गते गाउँ–नगरपालिका अधिवेशन, असोज १० गते प्रदेशसभा तथा प्रतिनिधिसभा क्षेत्रीय अधिवेशन र असोज १६ देखि १९ गतेसम्म केन्द्रीय महाधिवेशन गर्ने कार्यक्रम छ।
