काठमाडौं – गृहमन्त्री सुधन गुरुङ र भारतका गृहमन्त्री अमित शाहबीच भेटवार्ता भएको छ। भारतमा सम्पन्न पहिलो बिमस्टेक गृहमन्त्रीस्तरीय बैठकमा सहभागी हुन नयाँदिल्ली पुगेका गृहमन्त्री गुरुङले मंगलबार भारतीय समकक्षी शाहसँग भेटवार्ता गर्नुभएको भारतस्थित नेपाली दूतावासले जनाएको छ।
भेटका क्रममा नेपाल र भारतबीचको द्विपक्षीय सुरक्षा सहयोग सुदृढ बनाउने, सीमा व्यवस्थापनलाई प्रभावकारी बनाउने तथा अन्तरदेशीय अपराध नियन्त्रण गर्ने विषयमा छलफल भएको बताइएको छ। त्यसैगरी, विपद् पूर्वतयारी र प्रतिकार्यलाई थप प्रभावकारी बनाउने विषयमा पनि दुवै पक्षबीच कुराकानी भएको थियो।
भेटमा गृहमन्त्री गुरुङले सार्वभौम समानता, पारस्परिक सम्मान र विश्वासका आधारमा दुवै देशका जनताको हितका लागि व्यावहारिक सहयोगलाई अगाडि बढाउनुपर्नेमा जोड दिनुभएको थियो।
यसैगरी, नेपालमा हालै आएको बाढी र पहिरोपछि भारत सरकारले समयमै उपलब्ध गराएको सहयोगका लागि गृहमन्त्री गुरुङले भारत सरकारप्रति धन्यवाद व्यक्त गर्नुभएको छ। भेटवार्तालाई दुई देशबीच सुरक्षा सहकार्य र आपसी सम्बन्धलाई थप मजबुत बनाउने प्रयासका रूपमा हेरिएको छ।
