धनगढी । सुदूरपश्चिम प्रदेशको चालु आर्थिक वर्ष २०८३/८४ को बजेट प्रदेश प्रमुख नजिर मियाँले प्रमाणीकरण गर्नुभएको छ। प्रदेशसभाको बैठकले पारित गरेका बजेटसम्बन्धी दुई विधेयक प्रदेश प्रमुख मियाँले आज प्रमाणीकरण गर्नुभएको हो।
प्रदेश सरकारका अर्थमन्त्री चक्र मल्लले गएको आइतबार प्रदेशसभामा ३७ अर्ब ७० करोड रुपैयाँको बजेट प्रस्तुत गर्नुभएको थियो। बजेटमाथिको छलफल र राजनीतिक विवादका बीच हिजो प्रदेशसभाबाट बजेट पारित भएको थियो।
बजेट प्रमाणीकरण भएसँगै तीन महिनादेखि प्रभावित हुँदै आएको सरकारी खर्चको बाटो खुलेको छ। बजेट पारित हुन नसक्दा साउन १ गतेदेखि प्रदेश सरकारको नियमित खर्च प्रभावित भएको थियो।
दसैँ नजिकिँदै गर्दा कर्मचारीले पारिश्रमिकसमेत नपाउने अवस्था सिर्जना भएपछि सरकार बजेट पारित गराउन दबाबमा परेको थियो। नयाँ आर्थिक वर्ष सुरु भए पनि बजेट पारित नहुँदा प्रदेश सरकारका विकास निर्माणका योजना, कार्यक्रम कार्यान्वयन तथा विभिन्न सरकारी निकायको नियमित कामकाजमा असर परेको थियो।
