काठमाडौँ – बंगालको खाडीमा विकसित भइरहेको न्यूनचापीय प्रणाली चक्रवातमा परिणत हुने र त्यसको प्रभाव नेपालमा पनि पर्न सक्ने जल तथा मौसम विज्ञान विभागको मौसम पूर्वानुमान महाशाखाले जनाएको छ। महाशाखाले विशेष बुलेटिन जारी गर्दै आउँदो हप्ता सम्भावित प्रतिकूल मौसमबाट सतर्क रहन आग्रह गरेको छ।
महाशाखाका अनुसार उक्त प्रणाली कात्तिक ९ गते चक्रवातमा विकसित भई भारतको उत्तर आन्ध्र प्रदेश र दक्षिण ओडिसाको तटीय क्षेत्रबाट जमिनमा प्रवेश गर्न सक्ने सम्भावना छ। यसको प्रभावले कात्तिक ११ देखि १५ गतेसम्म नेपालका विभिन्न स्थानमा मौसम बदली र वर्षा हुन सक्ने अनुमान गरिएको छ।
नेपालमा कति वर्षा हुन्छ र त्यसबाट कस्तो जोखिम उत्पन्न हुन्छ भन्नेबारे अहिले नै यकिन गर्न नसकिने महाशाखाले जनाएको छ। सम्भावित मौसमले कृषि तथा पर्यटन क्षेत्रमा असर पार्न सक्ने भएकाले सतर्क रहन आग्रह गरिएको छ। मौसम प्रणालीको निरन्तर निगरानी भइरहेको र थप विवरण प्राप्त भएपछि सूचना अद्यावधिक गरिने महाशाखाले जनाएको छ।
