काठमाडौं ३१ साउन। इजरायल सरकारले कृषि क्षेत्रका लागि नेपालबाट एक हजार श्रमिक लैजाने भएको छ । श्रम, रोजगार तथा सामाजिक सुरक्षामन्त्री शेरबहादुर कुँवर र नेपालका लागि इजरायली राजदूत खनान गोदेरबीच सोमबार मन्त्रालयमा भएको भेटका क्रममा गोदेरले सोबारेमा जानकारी दिएका हुन् । मन्त्रालयका अनुसार भेटका क्रममा विशेष गरी दुई देशबीचको श्रम सम्झौताबारे छलफल भएको छ । छलफलमा राजदूत गोदेरले इजरायल सरकारले एक हजार नेपाली श्रमिक कृषि कामका लागि लैजाने विषयमा टुङ्गो लगाएको जानकारी दिए ।
साथै भेटका अवसरमा मन्त्री कुँवरले सहायक कामदारका रूपमा छनोटमा परेर करिब पाँच सय नेपाली युवा इजरायल जान बाँकी रहेकाले उनीहरूलाई छिटोभन्दा छिटो इजरायल लैजाने वातावरण बनाइदिन राजदूत गोदेरलाई अनुरोध गरे।