काठमाडौँ । पाल्पा, तानसेन नगरपालिका-४ ले तानसेनका महिलाहरुलाई व्यावसायिक बनाउने अभियान चलाएको छ । वडा नं ४ ले महिलाहरुलाई विभिन्न किसिमका सिपमूलक तालिम दिएर महिलालाई आत्मनिर्भर बनाउँदै आर्थिक विकासमा सहयोग पुर्याउने लक्ष्य लिएको वडा अध्यक्ष हेमन्तराज शाक्यले बताउनुभयो ।
तानसेन नगरपालिका–४ का महिलाहरुले स्थानीय उत्पादन प्रयोग गरेर जुस, जाम, जेली र मिक्स जाम बनाउने सिप सिकेका छन् । १२ वटा टोलविकास संस्थाका ३० जना महिलाले स्थानीय उत्पादन, सुन्तला, मौसम, बेलाउती, स्याउको प्रयोग गरेर स्थानीय रुपमा जेली, जाम र जुस बनाउने तालिम लिए । वडा नं ४ को आर्थिक सहयोग, मखनटोल टोल विकास संस्थाको आयोजनामा ४ दिने जुस बनाउने तालिम दिएको मखनटोल विकास संस्थाका अध्यक्ष ज्ञानु कार्कीले बताउनुभयो ।
तानसेन नगरपालिकाका नगरप्रमुख सन्तोषलाल श्रेष्ठले तानसेनका महिलाले जुस जाम बनाउँदा स्थानीय उत्पादनको प्रयोग हुने र कृषकको आयआर्जनमा वृद्धि हुने बताउनुभयो । श्रेष्ठले महिलाले आयआर्जन गरेपछि घरमा पनि सहज हुने बताउँदै गुणस्तरीय जुस, जाम, जेली बनाउनमा लाग्नुपर्ने, उत्पादन गरेर एउटा उद्योगको रुपमा दर्ता गर्न आग्रह गर्दै आवश्यक पर्ने सरससमान र बजारीकरणमा नगरपालिकाले सहयोग गर्ने बताउनुभयो ।
नगर प्रवक्ता यादवसिंह कार्कीले तालिमलाई व्यावहारिक रुपमा प्रयोगमा ल्याउन नगरपालिकाबाट संस्थाले खोजेको सहयोग प्रदान गर्न सकिने बताउनुभयो । महिला लक्षित बजेटबाट महिलाको आयआर्जनमा वृद्धि गर्न, उत्पादनशील कार्यमा महिलालाई लगाउन यो कार्यक्रम गरिएको वडा कार्यालयले जनाएको छ । गोरखापत्र