काठमाडौँ । धनकुटा नगरपालिका २ मा रहेको मधुगङ्गामा पूर्वाधार निर्माणपछि सो क्षेत्रको स्वरुप नै फेरिएको छ । लामो समयसम्म बेवास्तामा परेको यो स्थल अहिले भने निक्कै आकर्षक बनेको छ ।
पूर्वाधार निर्माण अघिसम्म मन्दिरमा जानै जोखिम रहेकोमा अहिले निक्कै सहज भएको छ । धाममा शिव मन्दिर, ढुङ्गेधारा, व्यापारिक भवन, सडक, शौचालय, सिंढी, पुजारी घर, पुल, गेट, पोखरी आदि संरचना निर्माण गरिएको छ । धार्मिक तथा पर्यटकिय रुपमा विकास गर्न मन्दिरमा पूर्वाधार निर्माणको काम गरीएको धनकुटा नगरपालिका २ का वडाध्यक्ष चन्द्रलाल तामाङ बताउनुहुन्छ । “यहाँ सम्भावना धेरै थियो तर पूर्वाधार अभावका कारण धेरै समस्या थियो तर अहिले आकर्षकसँगै सहज पनि भएको छ,” वडाध्यक्ष तामाङ भन्नुहुन्छ ।
यो धाममा ६० फिट अग्लो झरनाको सँगै करिब ६० फिट लामो प्राकृतिक गुफा छ । पौराणिक कालमा मधु र गङ्गा दुई जना आएर महादेवको खोजी गरेपछि प्रकट भएको इतिहास पाइन्छ । गुफाभित्रको पथ्थरमा शिवलिङ्गको आकृति देख्न सकिन्छ । खोलामा रहेको सो स्थानमा सहजताका लागि वडा र नगरपालिकाले १० लाखको डिपिआर तयार गरेको थियो । सोही डिपिआर अनुसार पूर्वाधार निर्माणका लागि करिब ६ करोड रुपियाँ बजेट विनियोजन भएपनि थेगिम सिंह जेबीले ३ करोड ७० लाखमा पूर्वाधार निर्माणको ठेक्का पाएको थियो ।
पूर्वाधार निर्माण अघिसम्म निक्कै जोखिमपूर्ण अवस्थामा रहेको यो स्थान पूर्वाधार निर्माणपछि सहज भएको स्थानीयको भनाइ छ । पहिलेपहिले यो स्थानमा जान निक्कै असहज हुने गरेकोमा अहिले धेरै सहज भएको स्थानीय युवराज दर्नाल बताउनुहु्न्छ ।
ऐतिहासिक धाममा हरेक वर्ष मङ्सिरे पूर्णिमामा ५ दिन मेला लाग्ने गर्दछ भने साउन महिना र माघेसङ्क्रान्तिमा पनि भक्तजनको घुँइचो हुने गरेको छ । यहाँ दर्शन गरे मनोकांक्षा पूरा हुने विश्वास गरिन्छ । त्यस्तै विभिन्न भाकल गरी भाकल छिन्ने गरिएको छ । धनकुटा सदरमुकामवाट करिब १२ किलोमिटर पूर्वमा तथा हिलेबाट करिब नौ किलोमिटरको दूरीमा छ । हिलेबाट आउने सडक कालोपत्र गर्न थालिएपछि यो क्षेत्रका स्थानीय थप उत्साहित भएको स्थानीय डम्बर राई बताउनुहुन्छ । “अहिले पूर्वाधार निर्माण भयो त्यस्तै मन्दिरसम्म आउने सडक पिच हुने क्रममा छ अब यो स्थान धार्मिक रुपमा मात्र नभई पर्यटकीय रुपमा समेत एक गन्तव्य बन्नेछ,” राईले भन्नुभयो । गोरखापत्र
