काठमाडौँ । रमेश लेखकले समाजमा लागुऔषध सेवन ,आत्महत्या र सडक दुर्घटना चुनौतीपूर्ण रहेको बताउनुभएको छ ।
शुक्रवार महेन्द्रनगरमा एन प्याबसन कञ्चनपुरले आयोजना गरेको खेल महोत्सवलाई सम्बोधन गर्नुहुदै गृहमन्त्री लेखकले अहिले मुख्य चुनौतीका रुपमा लागुऔषध सेवन,आत्महत्या र सडक दुर्घटना रहेको बताउनुभयो ।
उहाँका पछिल्लो समय लागुऔषधले भयावय स्थिति रहेको बताउँदै यसको न्युनीकरणका लागि विद्यालय स्तरबाट अभियान सञ्चालन गर्नुपर्ने बताउनुभयो । “समाजमा लागुऔषध,आत्महत्या र सडक दुर्घटना मुख्य चुनौतीका रुपमा देखिएको छ ।” गृहमन्त्री लेखकले भन्नुभयो–“लागुऔषधबाट समाजको मुक्तिका लागि अभियान सञ्चालन गर्नुपर्ने छ यसका लागि एन प्याबसनले विद्यालयस्तरबाटै सुरुवता गरोस ।” उहाँले लागुऔषधले घर घरका बालबालिकाहरु प्रभावित भइरहेकाले स्थानीय सरकार र निजी संघ संस्था सबैले गम्भीर रुपमा लिएर लागुऔषधको विरुद्धमा अभियान सञ्चालन गर्नुपर्ने बताउनुभयो ।
त्यसैगरी उहाँले निजी तथा आवासीय विद्यालयहरुले शिक्षाको गुणस्तर वृद्धि गर्न महत्वपूर्ण भुमिका रहेको बताउनुभयो । “सरकारले संविधानमा नै निःशुल्क शिक्षा र अनिवार्य शिक्षाको व्यवस्था गरेका छौ ।” उहाँले भन्नुभयो–“त्यसकारण सामुदायिक विद्यालय राम्रो गुणस्तरका साथ अघि बढुन तीनै तहका सरकारले यसमा ध्यान दिनुपर्छ ।” उहाँले शिक्षाको क्षेत्रमा निजी र आवासीय विद्यालयको पनि महत्वपूर्ण भूमिका रहेको बताउँदै सार्वजनिक र सामुदायीक विद्यालयको गुणस्तर बढेको बताउनुभयो ।
“सरकारले निजी विद्यालयलाई पनि राम्रोसँग सञ्चालन गर्ने कुरामा सरकार लाग्ने छ ।” उहाँले भन्नुभयो–“शिक्षाको गुणस्तरसंग सम्झौता गर्ने कुरा,चर्को शुल्क लिने कुरामा सरकारले नियमन गर्नुपर्छ ।” उहाँले अहिले संघिय संसदमा विद्यालय सम्बन्धी विधेयक छलफलमा रहेको बताउनुभयो । “हामी शिक्षा विधेकयक पारित गरेर शिक्षाको क्षेत्रमा राम्रो कानुन निमार्ण गरेर शिक्षालाई अत्यन्त शुलभ, सरल र सबै नेपाली नागरिकको पहुँच हुन सक्ने तर्फ सरकार लाग्ने छ ।” त्यसैगरी उहाँले खेल महोत्वसले विद्यार्थीहरुको चौतर्फी विकासमा टेवा पुग्ने बताउनुभयो ।
