काठमाडौँ । गृहमन्त्री रमेश लेखकले लागू औषधमुक्त समाज निर्माणका निम्ती लागू औषध विरुद्धको महाअभियानलाई देशव्यापी बनाउनुपर्नेमा जोड दिनुभएको छ । शनिबार काठमाडौँ उपत्यका प्रहरी कार्यालयले सुरु गरेको लागू औषध विरुद्धको महाअभियान उद्घाटन समारोहमा बोल्दै गृहमन्त्री लेखकले लागू औषध व्यक्ति, परिवार हुँदै समाजकै लागि घातक रुपमा देखा परिरहेको बताउनुभयो ।
“ लागू औषध अत्यन्त चुनौतीका रुपमा देखिएको छ, युवाहरुमा नकरात्मक असर पारेको छ ।” गृहमन्त्री लेखकले भन्नुभयो–“ सरकार, प्रहरीको मात्रै विषयवस्तु छैन, होइन, यो समग्र समाजकै चिन्ताको विषय भइसकेको छ ।”
लागू औषधले व्यक्तिलाई मात्र नभई समग्र समाजलाई खोक्रो बनाउँदै लगेकोप्रति चिन्ता व्यक्त गर्दै उहाँले यसको नियन्त्रणका लागि तीन वटै तहका सरकारले अभियानका रुपमा सञ्चालन गर्न जरुरी रहेको बताउनुभयो । “ लागू औषध प्रयोगकर्ताको जीवन समाप्तीतर्फ गएकै छ । समग्र परिवार नै चिन्ता र पीडामा जान्छ । यसले अरु अपराधको पनि वृद्धि गरेको छ ।” उहाँले भन्नुभयो–“ समाजमा विविधखालको अपराध वृद्धि भइरहेको छ । धेरै अपराधको जगमा लागूऔषध छ ।” लागूऔषध विरुद्धको महाअभियान देशव्यापी रुपमा चलाउन जरुरी रहेको भन्दै उहाँले विद्यालय स्तरसम्म महाअभियान पुर्याउन आवश्यक रहेको बताउनुभयो ।
“महाअभियानलाई प्रत्येक जिल्ला पालिका र टोल, विद्यालय क्याम्पससम्म जोड्नुपर्छ । यदि समयमै नियन्त्रण गरेनौ भने दश/पन्ध्र वर्षमा एउटा पुस्ता नै नराम्रोसित प्रभावित हुने खतरा देखिराख्याछु । ” उहाँले भन्नुभयो–“ ‘जुन ढंगले लागूऔषधको ओसारपसार, भण्डारण र प्रयोग भइरहेको छ । त्यसले आगामी दश पन्ध्र वर्षमा भयाभहवस्थिती ल्याउने अवस्था देखिरहको छु ।”
“लागूऔषध मुक्त समाज निर्माणका लागि देशव्यापी बनाउन आवश्यक छ र प्रहरीलाई यो महाअभियान देशव्यापी रुपमा लैजान निर्देशन दिन्छु ।” गृहमन्त्री लेखकले भन्नुभयो–“यसमा सबै तहका सरकारले पनि सहयोग गर्न आवश्यक छ । यसलाई सबैले अभियानका रुपमा अगाडी बढाउनुपर्छ ।”
सवारी दुर्घटना, लुटपाट, चोरी, साइबर अपराध, आत्महत्या, यौनजन्य घटनाका पछाडी लागूऔषध एउटा कारकका रुपमा रहेको उहाँको भनाई थियो । “ एक दिनमा सात जनाको सवारी दुर्घटनामा मृत्यु र १७ जनाले दैनिक आत्महत्या गरिरहेको छ । यसका पछाडी पनि लागूऔषध कारक देखिन्छ ।” लेखकले भन्नुभयो–“समाजमा अपराध वृद्धि, अराजकता र बेतिथिका पछाडी लागूऔषध र मापद पदार्थ कारकका रुपमा देखा परेकाले समाजका धेरै अपराधहरुको नियन्त्रणका लागि लागूऔषध नियन्त्रण गर्न आवश्यक छ ।” लागूऔषध नियन्त्रण गर्न सके धेरै अपराधका कमी ल्याउन सकिने मन्त्री लेखकको भनाई छ ।