काठमाडौँ । हुलाकी राजमार्ग अन्तर्गत नवलपरासीको नारायण चोक (गोपीगन्ज) देखि रानी नगरसम्म (त्रिवेणी) सडक निर्माणमा ठेकेदारले ढिलासुस्ती गरेपछि स्थानीयले सास्ती खेप्नुपरेको छ । १५ किलोमिटरको लामो सडक खण्ड कालोपत्रेको काममा अटेरी गरेपछि स्थानीय आजित बनेका छन् । उक्त सडक निर्माणका लागि बज्र गुरु महालक्ष्मी जेभी ललितपुरले ठेक्का लिएको थियो । २०७६ मङ्सिर १ गते निर्माण कार्य ३ वर्षभित्र सक्ने गरी ठेक्का भएको थियो । छ वर्ष पुग्दासम्म निर्माण कार्यमा प्रगति नदेखिएपछि सोमवार स्थानीय र जनप्रतिनिधिको टोलीले हुलाकी राजमार्ग निर्माण कार्यालय गोरुसिङ्गे कपिलवस्तुमा विरोध प्रदर्शन गरेका थिए । कार्यालय र ठेकेदार बिच काम सुचारु गर्ने सहमति भए पनि ठेकेदार पक्ष जिम्मेवार नभएको प्रतापपुर गाउँपालिकाका अध्यक्ष उमेशचन्द्र यादवले बताउनु भयो ।
उहाँले भन्नुभयो,‘ आन्दोलन गर्नु पर्ने रहर नभएर बाध्यता रहेको हो । निर्धारित समयमा सम्पन्न हुनुपर्ने हो तर ६ वर्ष हुँदासम्म पनि काम थाँती छ । सडकको अवस्थाको कारण आजित भएर विभिन्न समयमा धर्ना प्रदर्शन, अनसन आमरण अनसन लगाएका विरोध गरे पनि कामले गति लिन सकेको छैन । हुलाकी परियोजना कार्यालय र ठेकेदार बिच दसैँ अगाडि ३ किलोमिटर र चैत्रभित्र पूरै सडक निर्माण गर्ने काम सम्पन्न गर्ने सहमति पनि कार्यान्वयन भएको छैन । ’ हुलाकी राजमार्ग योजना कार्यालय गोरुसिङ्गे कपिलवस्तुका प्रमुख होमबहादुर एसीले सडक निर्माणका लागी कार्यालयको तर्फबाट पटक पटक ताकेका भएको बताउनुभयो । निर्माण व्यवसायीले विभिन्न बहानाबाजी गर्दै कामले गति लिन सकेको छैन । दुई चार दिनदेखि ठेकेदार पक्षले काम सुरु गर्न लागेका छन् । असार मसान्तसम्म भए पनि काम सम्पन्न गरिने कार्यालय प्रमुख एसीले स्पष्ट पार्नुभयो ।
वर्षा हुँदा हिलाम्मे र घाम लाग्दा धुलाम्मे हुन्छ । सवारी साधन लिएर हिँड्दा कतै दुर्घटना हुन्छ कि भन्ने डर छ । हामी स्थानीय झन् अझ पीडित भएका छौ । निर्माण सकिने प्रत्याभूति नहुँदासम्म आन्दोलन जारी रहने प्रतापपुरकी ओमका उपाध्यायले बताउनुभयो । उक्त सडकले हुलाकी सडक तल बर्दघाट नगरपालिका, प्रतापपुर गाउँपालिका हुँदै सुस्ता गाउँपालिकासम्म जोड्नेछ । दुई लेनको पिच सडक निर्माणका लागि ४९ करोडभन्दा बढी रकममा ठेक्का भएको थियो ।
