काठमाडौँ । गुल्मीको छत्रकोट गाउँपालिकाले एसइई परीक्षामा चार जिपिए ल्याउने विद्यार्थीलाई एक लाख ५१ हजार रुपियाँ दिने भएको छ । गाउँपालिकाको शिक्षा समितिको चैत २ गते निर्णय अनुसार ३.९० देखि ३.९९ जिपिए ल्याउनेले ५१ हजार र ३.८० देखि ३.८९ जिपिए प्राप्त गर्ने विद्यार्थीलाई २५ हजार गाउँपालिकाले प्रदान गर्नेछ । यो वर्ष छत्रकोट गाउँपालिकाका दुई परीक्षा केन्द्रबाट एक सय पाँच जना छात्रा र एक सय २२ छात्र गरेर दुई सय २७ जनाले एसईइ परीक्षा दिइरहेको छत्रकोट गाउँपालिकाले शिक्षा शाखाका प्राविधिक सहायक बिनोद न्यौपानेले जानकारी दिनुभयो ।
शैक्षिक सत्र २०८० मा छात्रा एक सय ५२ र छात्र एक सय ४४ गरेर दुई सय ९७ विद्यार्थीले एसइई दिएका थिए भने ०७९ सालमा छात्रा दुई सय र छात्र एक सय ५३ गरेर तीन सय ५३ जना एसइई परीक्षामा सहभागी भएका थिए । छत्रकोटमा नौ सामुदायिक र एक संस्थागत गरेर १० मावि, चार आधारभूत र १४ प्रावि छन् । गाउँपालिकाले पहिलेदेखि नै २.८ जिपिए ल्याएर गाउँपालिकाभित्रका सामुदायिक विद्यालयमा प्लस टु पढ्नेलाई पूर्ण छात्रवृत्ति तथा प्लस टु गरेर गाउँपालिकाभित्र स्नातक अध्ययन गर्ने विद्यार्थीहरुलाई पनि पूर्ण छात्रवृत्तिको व्यवस्था गरेको छ ।