काठमाडौँ । जर्मनीको केन्द्र–वाम सोसल डेमोक्रेट्सले नयाँ गठबन्धन सरकारमा सामेल हुने सम्झौता स्वीकृत गरेको छ । यसले संसदलाई कन्जरभेटिभ नेता फ्रेड्रिच मेर्जलाई देशको नयाँ चान्सलरका रूपमा निर्वाचित गर्ने बाटो प्रशस्त गरेको छ । निवर्तमान चान्सलर ओलाफ स्कोल्जको पार्टी मेर्जको केन्द्र–दक्षिणपन्थी क्रिश्चियन डेमोक्रेटिक युनियन (सिडियु) र यसको बाभेरियन भगिनी पार्टी, क्रिश्चियन सोसल युनियन (सिएसयु) द्वारा नेतृत्व गरिएको गठबन्धनमा सामेल हुनेछ । क्रिश्चियन सोसल युनियन पार्टीले फेब्रुअरीमा जर्मनीको चुनावमा २८ दशमलव पाँच मतका साथ जित हासिल गरेको थियो ।
सोसल डेमोक्रेट्सले दोस्रो विश्वयुद्धपछिको सबैभन्दा खराब परिणाम भोग्नुपरेको थियो र १६ दशमलव चार प्रतिशत मतका साथ तेस्रो स्थानमा रह्यो । तर कन्जर्भेटिभहरूलाई दोस्रो स्थानमा रहेको अति–दक्षिणपन्थी, आप्रवासन विरोधी अल्टरनेटिभ फर जर्मनी बिना संसदीय बहुमत भेला गर्न उनीहरूको समर्थन चाहिन्छ । सोसल डेमोक्रेट्सले गत दुई हप्तामा मतदान गरेका आफ्ना तीन लाख ५८ हजारभन्दा बढी सदस्यको अनलाइन मतपत्रमा अप्रिलको सुरुमा भएको गठबन्धन सम्झौतालाई राख्यो । पार्टीले बुधबार उनीहरूका ५६ प्रतिशत सदस्यले मतदान गरेको र तीमध्ये ८४ दशमलव छ प्रतिशतले आफ्नो पक्षमा मतदान गरेको घोषणा गर्यो । यस सम्झौताले सोसल डेमोक्रेट्सलाई अन्य मन्त्रालयका साथै महत्त्वपूर्ण वित्त, न्याय र रक्षा मन्त्रालयहरू प्रदान गर्दछ । सिडियू र सिएसयूले पहिले नै सम्झौता स्वीकृत गरिसकेका छन् ।
जर्मन संसद्को तल्लो सदन मे ६ मा मेर्जलाई दोस्रो विश्वयुद्धपछिको देशको १०औँ नेताका रूपमा चयन गर्न बैठक बस्ने छ । यस गठबन्धनको लक्ष्य आर्थिक वृद्धिलाई प्रोत्साहित गर्ने, रक्षा खर्च बढाउने, आप्रवासनमा कडा दृष्टिकोण अपनाउने र २७–राष्ट्र युरोपेली सङ्घ (इयु) को सबैभन्दा बढी जनसङ्ख्या भएको सदस्यको लामो समयदेखि बेवास्ता गरिएको आधुनिकीकरणलाई समात्ने लक्ष्य राखेको छ । जर्मनी युरोप महादेशको सबैभन्दा ठुलो अर्थतन्त्र हो । न्डेस्टागको छ सय ३० सिटमध्ये तीन सय २८ सिटसहित गठबन्धनसँग अपेक्षाकृत सामान्य बहुमत छ । युनियन र सोसल डेमोक्रेट्सले पहिले जर्मनीलाई सँगै शासन गरेका छन् । रासस/एपी
