काठमाडौँ । सञ्चार तथा सूचना प्रविधि मन्त्री पृथ्वी सुब्बा गुरुङले सरकारले व्यवहारिक नीति तथा कार्यक्रम ल्याएको बताउनु भएको छ । मङ्गलवार सुर्खेतबाट दैनिक प्रकाशन हुँदै आएको युग आह्वान राष्ट्रिय दैनिकको २५ औ रजत जयन्तीको समारोहलाई सम्बोधन गर्दै मन्त्री गुरुङले एक बर्षमा र २०८४ सालसम्म सम्पन्न गरिसक्ने गरी कार्यक्रम ल्याएको बताउनु भयो । उहाँले प्रधानमन्त्री राष्ट्रपतिलगायतको नाम ल्याइएका कार्यक्रम प्राथमिकता नदिएर अध्ययन भएका कार्यक्रमलाई प्राथमिकता दिएको बताउनु भयो ।
उहाँले राम्रो काम गर्ने मान्छेलाई खोजाखोजी सिद्ध्याउने काम भइरहेको बताउनु भयो । खास गरी सामाजिक सञ्जाल मार्फत यो मनपरी गरिरहेकोले यस लाइ रोक्न सामाजिक सञ्जाललाई नियमन गर्ने विधेयक ल्याएको र सांसदबाट पास गरिने बताउनु भयो । नेपालमा प्रेस स्वतन्त्रताको नाममा अराजकता बढेको उल्लेख गर्दै यसलाई नियन्त्रण गर्न वर्तमान सरकार लागिपरेको उहाँको भनाइ छ । अनलाइनका कारण साइबर क्राइम बढेको उल्लेख गर्दै सामाजिक सञ्जाल प्रयोग र अभिव्यक्ति स्वतन्त्रताका नाममा समाजमा भ्रम फैलाउन कसैलाई छुट नभएको र संविधान भन्दा ठुलो केही नहुने भन्दै सबैले देशको कानुन मान्नु पर्ने मन्त्री गुरुङले बताउनु भयो ।