काठमाण्डौ – साउनको मध्यतिर पुग्दा देशभर ७८ प्रतिशत मात्रै धान रोपाइँ सम्पन्न भएको छ। धान उत्पादनमा अगाडि रहेका मधेश र कोशी प्रदेशमा अपेक्षाकृत कम रोपाइँ भएकाले यो वर्ष धान उत्पादनमा असर पर्ने संकेत देखिएको छ। बाली विकास तथा कृषि जैविक विविधता केन्द्रका अनुसार मधेश प्रदेशमा हालसम्म झन्डै ५२ प्रतिशत मात्रै रोपाइँ सम्पन्न भएको छ।
मधेशमा कुल ३ लाख ७२ हजार ६ सय ४५ हेक्टरमा धान रोपिने भए पनि हालसम्म मात्र १ लाख ९३ हजार १ सय १६ हेक्टरमा रोपाइँ भएको छ। यो अघिल्लो वर्षको तुलनामा करिब आधा मात्रै हो। गत वर्ष साउनको यसै समयमा मधेशमा ९२ प्रतिशत रोपाइँ सकिएको थियो।
धान उत्पादनमा दोस्रो स्थानमा रहेको कोशी प्रदेशमा पनि रोपाइँ सुस्त छ। यसपटक कोशीमा करिब ८० प्रतिशत रोपाइँ भएको छ, जबकि गत वर्ष सोही समयमा ९० प्रतिशत पूरा भइसकेको थियो।
सबैभन्दा राम्रो प्रगति सुदूरपश्चिम प्रदेशमा देखिएको छ, जहाँ ९९ प्रतिशत रोपाइँ सम्पन्न भइसकेको छ। त्यस्तै कर्णाली र लुम्बिनी प्रदेशमा झन्डै ९२ प्रतिशत, बागमतीमा ८७ प्रतिशत, र गण्डकी प्रदेशमा ८४ प्रतिशत रोपाइँ भएको केन्द्रले जनाएको छ।
जलवायुजन्य असहजता, ढिलो वर्षा र सिंचाइ सुविधाको अभावले तराईका प्रमुख धान उत्पादन क्षेत्रहरूमा रोपाइँमा ढिलाइ भएको विश्लेषण गरिएको छ। कृषि विज्ञहरूले यदि अबको केही दिनभित्रै व्यापक वर्षा भएन भने उत्पादनमा गम्भीर असर पर्ने चेतावनी दिएका छन्।
