काठमाडौं । झापाको दमकमा एक ५ वर्षीय बालक सुतिरहेको अवस्थामा मृत फेला परेका छन्। मंगलबार बिहान बालकको मृत्यु भएपछि प्रहरीले घटनाबारे अनुसन्धान सुरु गरेको छ।
इलाका प्रहरी कार्यालय दमकका अनुसार, दमक नगरपालिका–५, धनेश्वर चोक बस्ने चन्द्रमान रिमालका छोरा लविस रिमाल सुतेकै अवस्थामा मृत भेटिएका हुन्। प्रहरी निरीक्षक तथा इलाका प्रहरी कार्यालय दमकका प्रमुख राम तिम्सिनाका अनुसार, बालक लविस सोमबार राति बुवासँगै खाना खाई एउटै कोठामा सुतेका थिए। तर, मंगलबार बिहान ६ बजे उठेर हेर्दा उनी निष्प्राण अवस्थामा फेला परेपछि प्रहरीलाई खबर गरिएको थियो।
घटनापछि प्रहरीले आवश्यक कानुनी प्रक्रिया र प्रारम्भिक अनुसन्धान सुरु गरेको जनाएको छ। प्रहरीका अनुसार बालककी आमा विदेशमा (माल्दिभ्स) रोजगारमा गएकी थिइन्, र गत वर्ष त्यहीँ उनको पनि मृत्यु भएको थियो।
प्रहरीले घटनालाई संवेदनशील मानेर नजिकबाट अनुसन्धान गरिरहेको जनाएको छ। मृत्युको कारण पोस्टमार्टम रिपोर्टपछि मात्र यकिन हुने बताइएको छ।
