काठमाडौं । पाँचथरको तुम्बेवा गाउँपालिका–२, मेवामा सालनालसहितको नवजात शिशुको शव फेला परेको छ। गाउँको भिरमा फालिएको अवस्थामा शव भेटिएपछि स्थानीय तह र प्रहरी प्रशासनले घटना बारे अनुसन्धान थालेको छ।
गाउँपालिका अध्यक्ष बाबुराम खड्काका अनुसार, शिशुको अवस्था हेर्दा भर्खरै जन्मिएको जस्तो देखिन्छ र अनकन्टार भिरमा भेटिएको शव कसैले अनधिकृत रूपमा जन्माएर त्यहीँ फालेको हुनसक्ने अनुमान गरिएको छ।
घटनाको जानकारी पाएपछि अध्यक्ष खड्का स्वयं टोलीसहित घटनास्थल पुगेका थिए। त्यसपछि प्रहरीलाई बोलाएर कानुनी प्रकृया अनुसार मुचुल्का तयार पारिएको र शव परीक्षणका लागि प्रक्रिया अघि बढाइएको छ।
घटनाबारे थप अनुसन्धान भइरहेको जानकारी जिल्ला प्रहरी कार्यालय पाँचथरले दिएको छ। शव कसले, किन, र कुन अवस्थामा फालेको हो भन्नेबारे अनुसन्धानपछि मात्रै यकिन हुने प्रहरीले जनाएको छ।
