काठमाडौं, तिहार नजिकिँदै गर्दा सयपत्री र मखमली फूलको माग तीव्र रूपमा बढेको छ। व्यावसायिक उत्पादन अपेक्षाकृत कम भएकाले किसानहरूलाई अहिले फूल बेच्न भ्याइनभ्याई छ।
पूर्वी मकवानपुरको बकैयाका किसान नारायण घिमिरे पछिल्लो समय व्यस्त छन्। हेटौँडा उपमहानगरपालिका, बकैया, बागमती, ललितपुर लगायतका ठाउँबाट फूलको माग आएपछि उहाँ दिनहुँ फूल बिक्रीमा लागिरहनुभएको छ।
घिमिरेले करिब तीन कठ्ठा जमिनमा ‘टेनिस बल प्रजातिको सयपत्री’ फूल खेती गर्नुभएको छ। चितवनबाट २,५०० बिरुवा ल्याएर खेती सुरु गर्नुभएका उहाँले फूल प्रति माला रु. १०० देखि १२० र प्रति केजी रु. ५०० मा बिक्री गर्दै आउनुभएको छ।
उहाँका अनुसार, “बजारमा अहिले माग उच्च छ, ग्राहकहरू बारीमै फूल लिन आइपुग्छन्।” तिहारका लागि मात्र नभई अन्य सामाजिक कार्यक्रमहरूका लागि समेत फूलको माग भइरहेको छ। हालसम्म उहाँले दश हजार रुपैयाँभन्दा बढीको फूल बिक्री गरिसक्नुभएको छ भने तिहारसम्म डेढ लाख रुपैयाँभन्दा बढी आम्दानी हुने अनुमान गरिएको छ।
अहिले धेरै स्थानीय तहहरूले प्लास्टिकका फूल र बाहिरबाट आयात गरिने फूलमा प्रतिबन्ध लगाएकाले स्थानीय उत्पादनले सहजै बजार पाएको हो। मकवानपुरका हेटौँडा, मनहरी, बकैया लगायतका क्षेत्रमा हाल व्यावसायिक फूल खेती फस्टाउँदै गएको छ।
