काठमाडौं, कात्तिक १ – वर्षौंपछि पूर्ण रूपमा सञ्चालनमा आएको बागलुङको दावगरास्थित बसपार्कमा चहलपहल बढेको छ। यातायात सञ्चालनसँगै व्यापार, आवतजावत र समग्र क्षेत्रको गतिविधि सक्रिय बन्दै गएको छ।
भदौ दोस्रो सातादेखि नियमित रूपमा बस छुट्न थालेपछि बसपार्कमा यात्रु, अटो, जिप, माइक्रोबस र इभी गाडीहरूको आवागमन उल्लेख्य रूपमा बढेको हो। त्यसले नजिकैको उपल्लाचौर लगायतका क्षेत्रको व्यापारमा समेत सकारात्मक असर पार्न थालेको छ।
बसपार्कमा चहलपहल बढ्न थालेको अर्को कारण हो – अन्तर्राष्ट्रिय बागलुङ समाजले आयोजना गरेको पालिकास्तरीय भलिबल प्रतियोगिता। प्रतियोगिताले सयौं दर्शक र सहभागिहरूलाई आकर्षित गर्दै बसपार्क क्षेत्रलाई पुन: सक्रिय बनाएको छ।
नगरप्रमुख बसन्तकुमार श्रेष्ठका अनुसार, बसपार्कको जग्गा सम्याउने, घडेरी छुट्याउने र संरचना व्यवस्थापनको काम तीव्र गतिमा भइरहेको छ। बाँकी निर्माणसम्बन्धी काम छिट्टै सम्पन्न हुने र बसपार्कले पूर्ण क्षमतामा सेवा दिने अपेक्षा गरिएको छ।
निजी साझेदारीमा २५ वर्षको सम्झौता
बागलुङ नगरपालिका–४, उपल्लाचौरस्थित दावगरामा निर्मित बसपार्क २५ वर्षका लागि आरबी कन्स्ट्रक्सन प्रा.लि. पोखरासँग सम्झौता गरिएको हो। सम्झौता अनुसार, कन्स्ट्रक्सन कम्पनीले नगरपालिकालाई कुल ८ करोड ५५ लाख रुपैयाँ भुक्तानी गर्नेछ।
वार्षिक रुपमा नगरपालिकालाई १६ लाख २५ हजार, मुअक २ लाख ११ हजार, र अग्रिम कर २७ हजार ५४३ रुपैयाँ तिर्ने व्यवस्था गरिएको छ।
पूर्ण संरचना र सुविधा सहितको बसपार्क
बसपार्क १७ रोपनी क्षेत्रफलमा फैलिएको छ। यहाँ ३ वटा टिकट काउन्टर, १७ वटा सटर, ३ कर्मचारी कक्ष, १८ वटा शौचालय, इभी चार्ज स्टेसन, मोटर ग्यारेज, र खानेपानीको ट्याङ्की सञ्चालनमा छन्।
विगतको संघर्ष, अहिलेको सफलता
२०५८ सालमा स्थानीयले साढे १७ रोपनी जमिन निःशुल्क दिएकै कारण यो बसपार्कको काम सुरु भएको हो। तर २०७७ जेठमा निर्माण सकिए पनि पाँच वर्षसम्म प्रयोगमा नआएको बसपार्क अहिले भने सञ्चालनमा आएसँगै उपयोगमा आउन थालेको छ।
यसअघि प्रयोगमा रहेको चिप्लेटी बसपार्क सुनसान हुने चिन्ता थियो। तर नगरपालिकाले उक्त क्षेत्रलाई व्यवसायिक प्रयोजनमा विकास गर्ने तयारी गरेको बताइएको छ।
स्थानीयको आशा
अब बसपार्क सुचारु भएपछि उपल्लाचौर, रमेटार लगायतका स्थानीय बासिन्दा उत्साहित छन्। घडेरी व्यवस्थापन गरी स्थानीयलाई दिने काम अघि बढेपछि यस क्षेत्रमा अझ चहलपहल र आर्थिक गतिविधि बढ्ने विश्वास गरिएको छ।
