काठमाडौं कात्तिक १ – तुलसीपुर उपमहानगरपालिका–१९ छिल्लीकोटका किसान परवीर पुनले व्यवसायिक रूपमा सुरु गर्नुभएको किवी खेतीमा यस वर्ष फल लागेको छ।
करिब तीन वर्षअघि १२ कट्ठा जमिनमा किवी खेती सुरु गरेका पुनले यस वर्षदेखि फल दिन थालेको जानकारी दिनुभयो। किवी खेतीका लागि उपयुक्त मानिने १,२०० देखि २,४०० मिटर उचाइमा पर्ने छिल्लीकोट १४०० मिटर उचाइमा अवस्थित छ, जसले किवी उत्पादनका लागि अनुकूल वातावरण प्रदान गर्छ।
पुनले सल्यान जिल्लाबाट १०० भन्दा बढी किवीका बोट खरिद गरी रोपेका थिए। प्रति बोट रु २०० मा खरिद गरिएको बताउँदै, प्रारम्भिक उत्पादन हावापानी र असिनाका कारण अपेक्षाअनुसार नभए पनि अब व्यावसायिक विस्तार गर्ने योजना रहेको उहाँले बताउनुभयो।
नेपालमा किवी खेती सन् १९०६ मा न्यूजील्यान्डबाट सुरु भएको हो भने नेपालमा २०४३ सालमा कीर्तिपुरस्थित बागवानी विकास आयोजनामार्फत परीक्षण गरिएको थियो। हाल नेपालका ४० भन्दा बढी जिल्लामा किवी खेती विस्तार भइसकेको छ।
चिसो र समशितोष्ण हावापानीमा किवीले राम्रो उत्पादन दिने गरेको छ। सामान्यतया रोपेको ५ वर्षपछि प्रतिवोट ८० देखि १०० केजीसम्म उत्पादन हुने गर्दछ। किवीमा भिटामिन सी र ई पाइने भएकाले यसबाट छालाको सौन्दर्य बढाउने लोसन, क्रिम लगायतका सामग्री पनि उत्पादन गरिन्छ।
किसान पुनको पहलसँगै छिल्लीकोट क्षेत्रलाई भविष्यमा किवी खेतीको सम्भावित केन्द्रका रूपमा विकास गर्न सकिने देखिएको छ।
