काठमाडौं, कात्तिक २ — रौतहटका नौ वटा स्थानीय तहमा प्रमुख प्रशासकीय अधिकृतको अभावका कारण आर्थिक कारोबार हालसम्म पनि ठप्प रहेको छ। कोष तथा लेखा नियन्त्रक कार्यालय, रौतहटले ती पालिकाहरूको खाता बन्द गरेको हो।
खाता बन्द भएका पालिकाहरूमा गौर, इशनाथ, राजपुर, परोहा, बौधीमाई, मौलापुर, फतुवा विजयपुर, गढिमाई र माधवनारायण नगरपालिका छन्।
जिल्लाका १८ वटा स्थानीय तहमध्ये हालसम्म गरुडा, कटहरिया, चन्द्रपुर नगरपालिका तथा यमुनामाई र दुर्गा भगवती गाउँपालिकामा मात्रै दरबन्दीअनुसारका प्रमुख प्रशासकीय अधिकृत कार्यरत छन्। बाँकी १३ वटा पालिकामा निमित्त प्रमुख प्रशासकीय अधिकृत रहेका कारण ती पालिकाहरूको आर्थिक कारोबार कात्तिक १ गतेदेखि बन्द गरिएको हो।
संघीय मामिला तथा सामान्य प्रशासन मन्त्रालयले असोज ८ गते महालेखा नियन्त्रक कार्यालयलाई पत्र पठाएर निमित्त अधिकृतलाई असोज मसान्तसम्म (पहिलो त्रैमासिक) मात्र खर्चको अख्तियारी दिएको थियो। त्यसअनुसार असोज ३१ गते राति १० बजेपछि नौ वटा पालिकाको स्थानीय सञ्चित कोष व्यवस्थापन प्रणाली (सूत्र) बन्द गरिएको कोष नियन्त्रक देवी प्रसाद गौतमले जानकारी दिनुभयो।
देवाही गोनाही र गुजरा नगरपालिकामा प्रमुख प्रशासकीय अधिकृत नहुँदा चालु आर्थिक वर्षको सभा तथा खाता सञ्चालन हुन सकेको छैन। राजदेवी नगरपालिकामा असोज ३१ गते पुनः निमित्त अधिकृत खटाइएको छ भने वृन्दावन नगरपालिकामा खटिएका निमित्त अधिकृत रमाना लिन नमानेपछि खाता निष्क्रिय गरिएको हो।
कोष नियन्त्रक गौतमका अनुसार अब खाता पुनः सञ्चालन गर्न संघीय मन्त्रालयको नयाँ निर्देशनको प्रतीक्षा गर्नुपर्नेछ — जसअन्तर्गत दरबन्दीअनुसार प्रमुख प्रशासकीय अधिकृत खटाउने वा निमित्त अधिकृतलाई थप अख्तियारी दिने निर्णय हुनसक्छ।
