काठमाण्डौ, कात्तिक ४
कञ्चनपुरका विपिन जोशीको मंगलबार महाकाली नदी किनारको भुजेलाघाटमा राष्ट्रिय सम्मानसहित अन्त्येष्टि गरिएको छ। इजरायलमा “सिक्दै सिकाउँदै” कार्यक्रमअन्तर्गत पुगेका जोशीको हामास र इजरायलबीचको द्वन्द्वमा ज्यान गएको थियो।
शवमा सशस्त्र प्रहरीको सलामी अर्पणसहित चितामा दागबत्ती दिइएको प्रमुख जिल्ला अधिकारी लक्ष्मण ढकालले जानकारी दिनुभयो।
श्रद्धाञ्जलीका क्रममा इजरायली राजदूत, स्थानीय तहका जनप्रतिनिधि, सुरक्षाकर्मी, प्रमुख जिल्ला अधिकारी, कूटनीतिक नियोगका पदाधिकारी, स्थानीय बासिन्दा, परिवारजन, र शुभेच्छुकहरू उपस्थित थिए।
विपिन २०८० असोजमा इजरायल गएका थिए। तर, द्वन्द्वमा परी मृत्यु भएपछि कूटनीतिक पहल कमजोर हुँदा दुई वर्षसम्म जानकारी नपाएको परिवारले जनाएको छ। असोज २७ गते मात्रै परिवारलाई विपिनको मृत्युबारे आधिकारिक सूचना आएको हो।
