काठमाडौं, कात्तिक ४
गुल्मीको मुसिकोट नगरपालिका–५, आँपचौर हात्तिगौँडाका विपन्न दलित शिवलाल विक (झिल्के दाइ) लाई सामाजिक सहयोगमा निर्माण गरिएको घर हस्तान्तरण गरिएको छ।
स्थानीय युवाहरूको पहलमा सञ्चालन गरिएको “झिल्के दाइको घर निर्माण” अभियान अन्तर्गत करिब चार लाख रुपैयाँको लागतमा निर्मित उक्त घर शुक्रबार हस्तान्तरण गरिएको हो। घर निर्माणका लागि मुसिकोट नगरपालिकाले जस्तापाताको खर्च प्रदान गरेको थियो भने बाँकी लागत स्वदेश तथा विदेशमा रहेका मनकारी व्यक्तिहरूको सहयोगमा जुटाइएको थियो।
घर नहुँदा छिमेकीको शरणमा बस्दै आएका ६ सदस्यीय विक परिवार नयाँ घर पाएपछि खुसी व्यक्त गरेका छन्। सामाजिक अभियन्ताहरूको सहकार्यमा विकको परिवारको लागि आँपचौरको देउरालीमा उक्त घर निर्माण गरिएको हो।
आर्थिक सहयोग गर्ने व्यक्तिहरूमा बिमल खरेल, सुमन खरेल, रामु खरेल, जीवन खरेल, अर्जुन खरेल, राजु अर्याल, खगेश्वर अर्याल, लिलामणी खरेल, विजय खरेल र सविन घिमिरेलगायतको सक्रियता उल्लेखनीय रहेको छ।
