काठमाडौं । नेकपा (एमाले) का अध्यक्ष तथा पूर्वप्रधानमन्त्री केपी शर्मा ओली र उनकी श्रीमतीका लागि भक्तपुरको गुण्डुमा नयाँ आवास निर्माण हुने भएको छ।
गुण्डुबासीको पहलमा बन्न लागेको सो आवासबारे जानकारी दिँदै एमाले पोलिटब्युरो सदस्य महेश बस्नेतले अध्यक्ष ओली दम्पतीका लागि ‘ओलीकुटी’ निर्माण गर्ने निर्णय भएको बताए।
बस्नेतका अनुसार स्थानीयवासीहरूले आफ्नै पहलमा ‘ओलीकुटी’ निर्माण गर्ने संकल्प लिएका छन् र आफू उक्त निर्माण समितिको संयोजकका रूपमा रहनेछन्।
गत भदौ २४ गते ओलीको बालकोटस्थित निजी निवासमा जेनजी आन्दोलनका नाममा आगजनी भएको थियो। उक्त भवन राज्यको नाममा नामसारी गरिएको भए पनि त्यहाँ ओलीले जीवनभर सङ्कलन गरेका पुस्तक, उपहार तथा अमूल्य सामग्रीहरू रहेका थिए। आगजनीपछि ती सामग्री नष्ट भएको र केही लुटपाटसमेत भएको ओली दम्पतीको भनाइ छ।
महेश बस्नेतका अनुसार बालकोटमा जलेको घर पुनःनिर्माण नहुने र नयाँ आवास गुण्डुमा निर्माण गरिने भएको हो। ओली दम्पतीले बस्नेत र एमाले नेताहरूको साथमा हालै बालकोटस्थित जलेको घर अवलोकन पनि गरेका थिए।
‘ओलीकुटी’ निर्माणका लागि भवनको संरचना र स्वरूपबारे सुझाव सङ्कलन थालिएको बस्नेतले बताएका छन्।
