काठमाडौं । जिल्ला प्रशासन कार्यालय ताप्लेजुङले चालु आर्थिक वर्षको पहिलो तीन महिनामा (साउनदेखि असोजसम्म) ६ हजारभन्दा बढी सेवाग्राहीलाई विभिन्न सेवा प्रदान गरेको जनाएको छ। प्रमुख जिल्ला अधिकारी शिवराज सेढाइँका अनुसार उक्त अवधिमा कार्यालयमार्फत ६ हजार २३५ जनाले सेवा प्राप्त गरेका छन्। तीमध्ये सबैभन्दा बढी राष्ट्रिय परिचयपत्र दर्ता सेवाग्राही रहेका छन्। कार्यालयका तथ्याङ्कअनुसार तीन महिनामा २ हजार ७६७ जनाको राष्ट्रिय परिचयपत्रसम्बन्धी विवरण दर्ता गरिएको छ। त्यसैगरी, १ हजार ४५८ जनालाई नागरिकता प्रदान गरिएको छ। तीमध्ये ७०४ नयाँ नागरिकता र ७५४ प्रतिलिपि नागरिकता वितरण गरिएको कार्यालयले जनाएको छ।
यस्तै, १ हजार १९२ जनाले राहदानीसम्बन्धी सेवा लिएका छन्। साथै, १८५ जनालाई राष्ट्रिय परिचयपत्र (कार्ड) र २२ जना बालबालिकालाई नाबालक परिचयपत्र वितरण गरिएको छ। प्रशासन कार्यालयले यस अवधिमा संघ संस्था दर्ता र नवीकरण, हातहतियार नवीकरण लगायतका सेवा पनि प्रदान गरेको जनाएको छ। यस अवधिमा अभद्र व्यवहार र ठाडो उजुरीसहित १६ वटा मुद्दा दर्ता भएका छन्। तीन महिनामध्ये असोज महिनामा मात्र १ हजार ३८५ जनाले विभिन्न सेवा लिएका छन्। असोजमै १९३ जनाको राहदानी अनलाइन फाराम नि:शुल्क भरिएको र २०७ जनालाई कागजातको फोटोकपीसम्बन्धी नि:शुल्क सेवा प्रदान गरिएको कार्यालयले जनाएको छ।
