काठमाडौं । बर्दिया जिल्लाको मधुवन नगरपालिका–३ भगरैयाकी ४५ वर्षीया कमला नेपाली सोमबार दिउँसोदेखि बेपत्ता हुनुभएको छ। उहाँ गाईबाख्राका लागि घाँस काट्न भगरैया सामुदायिक वनतर्फ जानुभएको थियो। तर साँझसम्म घर नफर्केपछि परिवार र स्थानीयवासीले खोजी सुरु गरेका छन्। मधुवन नगरपालिका–३ का वडाध्यक्ष नारायण मल्लका अनुसार नेपालीलाई खोज्न प्रहरी, सशस्त्र प्रहरी, जनप्रतिनिधि र स्थानीयवासीको टोली खटिएको छ। स्थानीयका अनुसार सो क्षेत्रमा पछिल्ला दिनमा पाटेबाघको गतिविधि देखिएको छ। यसै कारण बेपत्ता नेपालीलाई बाघले आक्रमण गरेको हुन सक्ने आशंका गरिएको छ।
