काठमाडौं । लगातार चार दिनदेखिको झरीले पूर्वपश्चिम राजमार्गअन्तर्गत नवलपुरको दाउन्ने सडक खण्ड हिलाम्य भएको छ । जसका कारण हिलोमा गाडीहरु फस्ने क्रम बढेपछि यात्रा एकतर्फी र कठिन भएको नवलपुर प्रहरीले जनाएको छ ।
शनिबार विनयी त्रिवेणी गाउँपालिका–२ घ्यु खोलाको हिलोमा ट्रक फसेर राति ९ बजेसम्म अवरुद्ध सडक आइतबार बिहानदेखि फेरि अवरद्ध भएको जिल्ला प्रहरी कार्यालयका सूचना अधिकारी, प्रहरी नायब उपरीक्षक मधु नेपालले जानकारी दिनुभयो ।
आज फेरि विनयी त्रिवेणीकै त्रिसट्ठी मोड र ज्यामिरे चोकमा सडक अवरुद्ध भएको छ । नेपालगञ्जबाट काठमाडौँ जाँदै गरेको बागमती प्रदेश ०३००१ ख ०९५२ नम्बरको सिमेन्ट लोड गरेको ट्रक बिग्रेको र सोही स्थान नजिकै दाङबाट नारायणघाटतर्फ जाँदै गरेको म १ ख ७४४ नम्बरको ट्रक बिग्रेर सडक अवरुद्ध भएको नेपालले जानकारी दिनुभयो ।
त्यस्तै, काठमाडौँबाट सुर्खेततर्फ जाँदै गरेको कर्णाली प्रदेश ०२००१ ख ०७७६ नम्बरको बस र २ ज्यामिरे चेकपोष्ट नजिक काठमाडौँबाट बर्दिया जाँदै गरेको ना ७ ख ६६६४ नम्बरको खाली ट्रक तथा नवलपरासीबाट चितवनतर्फ जाँदै गरेको ना ७ ख ६०५३ नम्बरको खाली ट्रक बिग्रेका कारण सडक अवरुद्ध भएको उहाँले बताउनुभयो ।
दाउन्ने सडक खण्डको हिलोमा पाँच वडा गाडी बिग्रेर फसेका कारण हाल यहाँ सवारी साधनको लामो जाम परेको प्रहरीको भनाइ छ । प्रहरी नायब उपरीक्षक नेपालका अनुसार यहाँ झण्डै पाँच सय गाडी जाममा फसेका छन् । जाममा रहेका सवारी साधन हटाई बाटो खुलाउने पहल भइरहेको नेपालले बताउनुभयो ।
बाटो हिलो र जाम भएका कारण दाउन्ने खण्डको १४ किलोमिटर पार गर्न ६ घण्टाभन्दा बढि समय लाग्ने गरेको यात्रुले बताएका छन् । हिजो दिनभर फसेको बा. प्र. ०३–००१ ख २१५८ नम्बरको माटो लोड गरेको ट्रक राति ९ बजे जेसीबीको मद्दतले निकालेर बाटो खुलाइएको थियो । गोरखापत्र
