काठमाडौं । धनकुटा जिल्लाको पाख्रीबास नगरपालिका–१०, चुङमाङमा बेवारिसे अवस्थामा एक थान भरुवा बन्दुक फेला परेको छ। उक्त बन्दुक झाडीभित्र लुकाएर राखिएको अवस्थामा प्रहरीले बरामद गरेको हो। धनकुटाको हिलस्थित प्रादेशिक प्रहरी चौकीबाट प्रहरी नायब निरीक्षक चिरञ्जीवी खड्काको नेतृत्वमा खटिएको गस्ती टोलीले बन्दुक फेला पारेको जिल्ला प्रहरी कार्यालय धनकुटाका प्रवक्ता डिएसपी राजन कार्कीले जानकारी दिनुभयो।
प्रवक्ता कार्कीका अनुसार सो बन्दुकमा बारुद र गोली भने फेला परेका छैनन्। बन्दुकलाई झाडीभित्र लुकाएर राखिएको अवस्थामा भेटिएकाले यस सम्बन्धमा थप अनुसन्धान भइरहेको उनले बताउनुभयो। प्रहरीले बरामद गरिएको बन्दुक जिल्ला प्रहरी कार्यालय धनकुटामा ल्याई आवश्यक अनुसन्धान अघि बढाएको जनाएको छ।
