काठमाडौं । चालु आर्थिक वर्ष २०८२/८३ को पहिलो तीन महिनामा लमजुङ जिल्लामा सरकारी कार्यालय र स्थानीय तहले गरी कुल २४ प्रतिशत बजेट खर्च गरेका छन्। साउनदेखि असोज मसान्तसम्मको अवधिमा यो खर्च भएको हो।
कोष तथा लेखा नियन्त्रण कार्यालय लमजुङका अनुसार संघ तथा प्रदेश अन्तर्गतका कार्यालयहरू, जिल्ला समन्वय समिति र जिल्लाभित्रका आठ स्थानीय तहले चालु र पुँजीगत गरी कूल ६ अर्ब ७२ करोड ६८ लाख १३ हजार ९५६ रुपैयाँमध्ये १ अर्ब ६१ करोड ४२ लाख २ हजार १०० रुपैयाँ खर्च गरेका छन्। यो कुल बजेटको २४.०१ प्रतिशत हो।
तीन महिनाको अवधिमा पुँजीगत खर्च भने निकै न्यून रहेको छ। पुँजीगततर्फ २ अर्ब ८० करोड ३८ लाख ६९ हजार रुपैयाँमध्ये १४ करोड ७७ लाख ५७ हजार ४३० रुपैयाँ अर्थात् ५.२७ प्रतिशत मात्रै खर्च भएको कोष तथा लेखा नियन्त्रण कार्यालयका प्रमुख भवराज जोशीले जानकारी दिनुभयो।
नेपाल सरकारको औसत खर्चको तुलनामा लमजुङमा खर्च दर केही उच्च रहेको कार्यालयले जनाएको छ। महालेखा नियन्त्रक कार्यालयका अनुसार असोज मसान्तसम्म देशभर ३ खर्ब ६४ अर्ब ५८ करोड ९४ लाख रुपैयाँ अर्थात् वार्षिक विनियोजनको १८.५६ प्रतिशत मात्र खर्च भएको छ।
