काठमाडौं । कञ्चनपुर जिल्लाको बेदकोट नगरपालिका–२ दैजीस्थित शंकर इँटा भट्टा नजिक एक पुरुषको शव बेवारिसे अवस्थामा फेला परेको छ। शव मङ्गलबार बिहान सडकको कल्भर्टभित्र सडेको अवस्थामा भेटिएको जिल्ला प्रहरी कार्यालय कञ्चनपुरका प्रहरी नायब उपरीक्षक (डीएसपी) सागर बोहराले जानकारी दिनुभयो।
पूर्व–पश्चिम राजमार्गसँग जोडिने सडक खण्डमा दुर्गन्ध आउन थालेपछि स्थानीयले प्रहरीलाई खबर गरेका थिए। सूचना प्राप्त भएपछि वडा प्रहरी कार्यालय दैजीका प्रहरी निरीक्षकको नेतृत्वमा पुगेको टोलीले शव निकाल्ने कार्य गरिरहेको डीएसपी बोहराले बताउनुभयो।
शवको पहिचान भने अहिलेसम्म खुल्न बाँकी रहेको प्रहरीले जनाएको छ। घटनाबारे थप अनुसन्धान भइरहेको जिल्ला प्रहरी कार्यालय कञ्चनपुरले जनाएको छ।
