काठमाडौं । लुम्बिनी प्रदेश प्रमुख कृष्णबहादुर घर्तीमगरले प्रदेश सभाको हिउँदे (सातौँ) अधिवेशन मङ्सिर ८ गतेदेखि आह्वान गरेका छन्। कात्तिक २४ गते बसेको प्रदेश मन्त्रिपरिषद्को निर्णयपछि मुख्यमन्त्री चेतनारायण आचार्यले अधिवेशन बोलाउन गरेको अनुरोधलाई स्वीकार गर्दै प्रदेश प्रमुखले संविधानबमोजिम अधिवेशन घोषणा गरेका हुन्।
नेपालको संविधानको धारा १८३(१) र धारा १६६(२) का आधारमा मङ्सिर ८ गते सोमबार दिउँसो १ बजेबाट अधिवेशन सुरु हुने जानकारी प्रदेश प्रमुखको कार्यालयका निमित्त सचिव ध्रुवकुमार कुवँरले दिएका छन्।
यस अधिवेशनका लागि प्रदेश सभा सचिवालयमा जिल्ला सभा तथा जिल्ला समन्वय समिति सञ्चालन सम्बन्धी ऐन, २०७५ संशोधन विधेयक तथा स्थानीय तहका पदाधिकारी तथा सदस्यहरूको सुविधा सम्बन्धी ऐन, २०७६ संशोधन विधेयक दर्ता भइसकेका छन्। साथै दलित अधिकार सम्बन्धी विधेयक र बडघरसम्बन्धी विधेयक दर्ता गर्ने तयारी भइरहेको सचिवालयले जनाएको छ।
त्यससँगै विभिन्न समितिका प्रतिवेदन तथा महालेखा परीक्षकको प्रतिवेदन पनि यसै अधिवेशनमा छलफलका लागि प्रस्तुत हुने छन्। लुम्बिनी प्रदेशको वर्षे अधिवेशन गत भदौ ३१ गते सम्पन्न भएको थियो।
