काठमाडौं । निर्वाचन आयोगले छ लाख २० हजार नयाँ मतदाता नाम दर्ता भएको जानकारी दिएको छ। आयोगका अनुसार यो तथ्यांक सोमबार राति ९ बजेसम्म अद्यावधिक गरिएको हो। आयोगले सार्वजनिक गरेको विवरणअनुसार तीन लाख ११ हजार ४१४ जना मतदाता आयोगको नियमित सर्भरमार्फत् दर्ता भएका छन् भने तीन लाख आठ हजार ५८५ जना राष्ट्रिय परिचयपत्रको आधारमा नयाँ मतदाता थपिएका छन्।
जेनजीलाई लक्षित गर्दै आयोगले अध्यादेशमार्फत् मतदाता नामावली दर्ता खुला गरेको छ। आगामी फागुन २१ गते तोकिएको प्रतिनिधिसभा निर्वाचनलाई ध्यानमा राख्दै देशभर मतदाता नामावली सङ्कलन जारी छ। पहिलो चरणमा कात्तिक ३० गतेसम्म मात्र दर्ता खुलाइएको थियो, तर पछाडि समय थपेर मंसिर ५ गतेसम्म नयाँ मतदाता नाम दर्ता गर्न सकिने व्यवस्था गरिएको छ।
