काठमाडौं । जिल्लामा अवैध सालका काठ बोकेको बस नियन्त्रणमा लिँदै प्रहरीले एक जनालाई पक्राउ गरेको छ। बाँकेको नेपालगञ्जबाट जाजरकोटको कालीमाटी हुँदै रुकुम पश्चिमको आठबिसकोटतर्फ जाँदै गरेको भे १ ख २७८३ नम्बरको बसमा काठ तस्करी भइरहेको सूचनाका आधारमा प्रहरीले कारबाही गरेको हो।
पक्राउ पर्नेमा दैलेखको नौमुले गाउँपालिका–१ निवासी ३० वर्षीय प्रकाशबहादुर सुनार, जो बसका धनी समेत हुन्, रहेका छन्। जिल्ला प्रहरी कार्यालय जाजरकोटबाट खटिएको टोलीले भेरी नगरपालिका–१३, कुदु नजिक बस रोकेर चेकजाँच गर्दा अवैध सालका कडी फेला परेपछि उनलाई नियन्त्रणमा लिएको प्रहरी नायब उपरीक्षक वसन्तकुमार शर्माले जानकारी दिए।
उहाँका अनुसार गाडी चालक सुर्खेत भेरीगङ्गा नगरपालिका–४ का कर्णबहादुर सुनार भने घटनास्थलबाट फरार भएका छन्। बसभित्र विभिन्न साइजका ४७ थान साल काठ बरामद गरिएको र काठसँगै बस पनि रीतपूर्वक जफत गरिएको प्रहरीले जनाएको छ। बरामद सामग्री र बससहित पक्राउ परेका सुनारलाई आवश्यक कानुनी प्रक्रियाका लागि डिभिजन वन कार्यालय, जाजरकोटमा बुझाइएको प्रहरीको भनाइ छ।
