काठमाडौं । नवलपुरको सदरमुकाम कावासोतीमा एकै घरका सात जनालाई रातभर बन्धक बनाएर गरिएको लुटपाटको घटना सार्वजनिक भएको छ। गत मङ्गलबार राति कावासोती–८ निवासी ४६ वर्षीय सञ्जय खड्काको परिवारलाई दुई जनाको समूहले घरभित्रै नियन्त्रणमा लिएर करिब ६ घण्टासम्म बन्धक बनाएको जिल्ला प्रहरी कार्यालय नवलपुरका सूचना अधिकारी, प्रहरी नायब उपरीक्षक मधु नेपालले जानकारी दिए।
माक्स लगाएर घरभित्र प्रवेश गरेका ती दुई जनाले खड्का परिवारको एक थान आइफोन, दुई थान रेडमि मोबाइल फोन तथा श्रीमतीका सुनका बाला लुटेको प्रहरीले जनाएको छ। अन्य सामान भने चोरी भएको छैन। घरमा जडान गरिएको सिसीटिभीमा पनि माक्स लगाएका दुई जनै देखिएको प्रहरीले बताएको छ। उनीहरू ज्यान लिनेसम्मका उद्देश्यले आएको हुनसक्ने आशङ्कामा अनुसन्धान तीव्र बनाइएको छ।
साँझ ७ बजेदेखि नियन्त्रणमा पारिएका परिवारका सदस्यहरू राति १ बजेतिर हारगुहार सुनेपछि लुटेरा फरार भएका थिए। पीडित सञ्जय खड्काका अनुसार लुटेराहरूले आफूहरू सामाजिक अभियन्ता भएको दाबी गर्दै स्थानीय मिटरब्याजीसम्बन्धी कार्यमा आएको जस्तो देखाएका थिए। निरन्तर धम्कीपछि आफूलाई मुक्का हानेपछि परिवारले प्रतिकार गर्दा ती व्यक्तिहरू मोबाइल र सुनका बाला लिएर भागेको उनले बताए। जिल्ला प्रहरी कार्यालय नवलपुरबाट करिब १ किलोमिटर दूरीमै भएको यस घटनाले स्थानीयवासीमा त्रास फैलिएको कावासोती–८ का कपिलदेव भुसालले बताए।
